भन्सार कार्यालयके छ महिनामे नाघल लक्ष्य
पहुरा समाचारदाता
धनगढी, ११ माघ । कैलालीस्थित भन्सार कार्यालय चालु आर्थिक बरसके छ महिनामे लक्ष्यसे ढिउर राजश्व उठैना सफल हुइल बा ।
कैलालीके टीकापुरस्थित सत्ती भन्सार कार्यालय खक्रौलासे छ महिनामे नै वार्षिक लक्ष्यसे सवा दुई करोड ढिउर राजश्व संकलन करले बा ।
खक्रौला भन्सार कार्यालयसे आव २०७७/७८ मे ६ करोड सात लाख राजश्व उठैना वार्षिक लक्ष्य राखलमे पुस मसान्तसम साढे आठ करोड राजश्व उठसेकल भन्सार प्रमुख विमलकुमार शाह जानकारी डेलै ।
‘हम्रे छ महिनामे लक्ष्य नाघल बाटी, लक्ष्य नाघेर सवा दुई करोड ढिउर राजश्व संकलन हुइल बा,’ भन्सार कार्यालय प्रमुख शाह कहलै, ‘हम्रे सीमामे कडाइ करले बाटी, हम्रे भन्सार छली रोक्न रणनीतिकरूपमे काम करटी रहल बाटी, जिहीसे राजश्वमे सुधार आइल बा ।’
कोरोना संक्रमणपाछे सीमानाका खुला नैहोके मनै खुलारूपमे सीमापार आउजाउ करे नैसेकके फेन भन्सार कार्यालयहे फाइदा हुइल बा ।
पाछेक समय खक्रौला नाका होके कच्चा पदार्थ आयात हुइटी रहल ओरसे फेन भन्सार कार्यालयके राजश्वमे वृद्धि हुइल उहाँके कहाइ बा ।
