‘भूमिहीन सुकम्वासीहे हाली जग्गा धनी बनैना’
पहुरा समाचारदाता
धनगढी, १३ माघ । धनगढी उप–महानगरपालिकासे भूमिहिन ओ सुकम्वासीहुक्रनके पहिचान, लगत संकलन ओ प्रमाणिकरण लगायतके काममा खटजैना कर्मचारीहे अभिमूखीकरण तालिम डेले बा ।
भूमिहिन ओ सुकम्वासीहुक्रनके पहिचान, लगत संकलन करेबर अपनाजैना विधी, फराम भर्ना तरिका, फारामके प्रकार, लगत संकलनमे अपनाइ पर्ना सजकताके वडाके वडा सचिव, सामाजिक परिचालक, भूमिहिन ओ सुकम्वासी लगत संकलन इकाई कार्यालयके कर्मचारीनहे अभिमूखीकरण करल धनगढी उप–महानगरपालिकाके नगरप्रमुख नृपबहादुर वड बटैलै ।
धनगढी उप–महानगरपालिकासे आयोजना करल अभिमूखीकरण कार्यक्रममे भूमी सम्वन्धी समस्या समाधान आयोगके कर्मचारीहुक्रे सहजीकरण करल नगरप्रमुख वड बटैलै ।
‘कौनो फेन भूमिहिन ओ सुकम्वासी जग्गाधनी पूर्जा पैनासे नैछुटे परल कना हो’, नगरप्रमुख वड कहलै–’ओकर लाग लगत संकलनसे नै त्रुटी नैहुइ परल ।’ भूमिहिन ओ सुकम्वासीहुक्रनहे जग्गाधनीपूर्जा डेना बात चुनावी घोषणापत्रमे नै राखल बटैटी नगरप्रमुख वड कहलै–‘उ कार्यकाल भित्रे पुरा करब ।’
धनगढी उप–महानगरपालिकाके उप–प्रमुख सुशीला मिश्र भट्ट लगत संकलनके लाग हाली कर्मचारी फिल्डमे खटाजैना बटैली । अभिमूखीकरण करल बा उप–प्रमुख भट्ट कहली–‘लगत संकलन ओ पहिचानमे त्रुटी हुइ नैडेना इहीसे सहयोग पुगी ।’
ओस्टके धनगढी उप–महानगरपालिकासे सुकम्वासी लगत संकलन इकाई कार्यालय स्थापना कैके काम सरु करले बा । जग्गा हस्तान्तरणके प्रकृया सरु करक लाग भूमिहीन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणिकरणके सक्कु काम सुकम्वासी लगत संकलन इकाई कार्यालयसे हुइना निमित्त प्रमुख प्रशासकिय अधिकृत लोकराज उपाध्याय बटैलै । ‘ऐलानी ओ प्रतिजग्गामे बैठलहुक्रनहे उप–महानगरपालिकासे सक्कु सेवा सुविधा डेके फेन करके दायरामे लाने सकेल नैहो’, उहाँ कहलै–‘आब हाली उ काम पुरा हुइ ।’
