प्रदेशसे प्राविधिक शिक्षाके निति बनैना
पहुरा समाचारदाता
धनगढी, १५ माघ । प्राविधिक शिक्षा तथा ब्यावसायिक तालिम परिषद् सुदूरपश्चिम प्रदेशसे बिफेक रोज धनगढीमे निति तर्जुमा तथा अन्तरक्रिया कार्यक्रम सम्पन्न करले बा ।
कार्यक्रममे सुदूरपश्चिम प्रदेश सरकारके मुख्यमन्त्री त्रिलोचन भट्ट, निति तर्जुमा आयोगके सदस्य ओ सामाजिक विकास मन्त्री लगायतके टमान शिक्षा क्षेत्रके प्रतिनिधिहुक्रनके उपस्थीति रहल रहे ।
कार्यक्रममे बोल्टी मुख्य मन्त्री भट्ट संघीय सरकारके प्राविधिक शिक्षा निति लम्मा समयसे अन्यौलतामे रहल ओ प्राविधिक शिक्षा पहे्र चहुइया बिद्यार्थीहुक्रनहे समस्या हुइल ओरसे प्रदेश सरकारसे प्रदेश निति बनाके प्राविधिक शिक्षाहे जोड डेना बटैलै । उहाँ केन्द्रके शिक्षानिती अन्यौलतामे रहल कहटी अपने प्रदेशमे सक्कु युवा पिढीहे अनुकुल हुइना मेरके निति निर्माण कैके प्राविधिक शिक्षा पठन पाठनके वातावरण श्रृजना करे पर्नामे जोड डेलै ।
ओस्टके सामाजिक विकास मन्त्री सुवेदी फेन शैक्षिक स्तरउन्नती सँगसँगे नेपालमे रोजगारी मूलक शिक्षा उत्पादन कैके स्वदेशमे रोजगारीके अबसर प्रदान कैनाके साथे भारत जैना क्रम रोके पर्ना बटैलै । उहाँ आगामी दिनमे बिद्यार्थी बर्गहे प्रोयोगात्मक शिक्षा ओ उत्पादन मूलक शिक्षा प्रणाली सुदूरपश्चिममे लागु करे पर्ना बटैलै ।
सुदूरपश्चिम प्रदेश प्राविधिक शिक्षा तथा ब्यावसायिक तालिम परिषद्के निर्देशक डा. कुश्माकर भट्ट इ क्षेत्रमे का कैसिन खाले शिप ओ दक्षता डेहेबर इ भेगके जनता स्वदेशमे स्वरोजगार बनैना निति निर्माणमे १० बर्षे कार्यनिति बनैना बटैलै । प्राविधिक शिक्षाहे रोजगारी मूलक शिक्षा बनाके प्रदेश सरकार, स्थानिय सरकार ओ सरोकारवाला जुटे पनौ उहाँके कहाइ रहे ।
