कटैनीमे झोलुङ्गे पुल निर्माण कार्यके उद्घाटन
पहुरा समाचारदाता
हसुलिया, १६ माघ । कैलालीके कैलारी गाउँपालिका–७, बसन्तास्थित कटैनी लडियामे झोलुङ्गे पुल निर्माण कार्य सुरु करल बा ।
गाउँपालिका कार्यालयके आर्थिक सहयोगमे झोलुङ्गे पुल निर्माण कार्य सुरु करल हो ।
गाउँपालिकाके प्रवक्ता एवम् वडा अध्यक्ष कमलप्रसाद चौधरी पुल निर्माण कार्यके उद्घाटन करले बटै । उ ठाउँमे ओहोरदोहोरके लाग बनाइल पुल हरेक वर्ष बर्खामे बाढसे पुहाई लागलपाछे झोलुङ्गे पुल निर्माण करे लागल वडा अध्यक्ष चौधरी बटैलै ।
पुल बनलपाछे बसन्ता, रतनपुर, नारायणपुरके गाउँवासीहे ओहोरदोहोरके लाग सहज हुइना उहाँ बटैलै । ‘काठुवाके पुल नइटिकी । पुल नइहुइलपाछे ओहोरदोहोर कैना समस्या हुइना करठ, उहाँ कहलै । ‘टबमारे सक्कु बेला नेंगघुममे सहजताके लाग झोलुङ्गे पुल बनाई लागल हो ।’
उ पुल निर्माणके लाग गाउँपालिकाके कार्यालयसे २० लाख रुप्या बजेट विनियोजन करल जनाइल बा । अइना असारभिटर पुल निर्माण कार्य सम्पन्न कैना लक्ष्य रहल वडा अध्यक्ष चौधरी बटैलै ।
ओस्टेक करके, खोनपुर घाटस्थित मोहना लडियामेफे झोलुङ्गे पुल निर्माणके कार्यहे आघे बढाइल बा । प्रदेश सरकारके सहयोगमे उ ठाउँमे झोङ्गे पुल निर्माण करे लागल हो ।
उहाँ पुल बनलपाछे मोहना लडिया पारके वस्ती शिवरत्नपुर गाउँके स्थानीयहे ओहोरदोहोर कैना सहज हुई ।
