गाउँ सभासे आइईई नियमावली ओ ओएनएम पास
पहुरा समाचारदाता
हसुलिया, १६ माघ । कैलालीके कैलारी गाउँपालिकाके गाउँसभा बैठकसे वातावरणीय प्रभाव मूल्यांकन (आइईई) ओ कर्मचारी संगठनात्मक ढाँचा (ओएनएम) पास करल बा ।
सातौं अधिवेशन अन्तर्गत शुकके बैठल गाउँ सभा बैठकसे आइईई नियमावली ओ ओएनएम पास करल हो । गाउँपालिकाके अध्यक्ष लाजुराम चौधरीके अध्यक्षतामे बैठल बैठकसे चालू आर्थिक बरसके पुस मसान्तसमके गाउँपालिकाके आर्थिक कारोबार फेन पास करल प्रवक्ता एवम् वडा नम्बर ७ के अध्यक्ष कमलप्रसाद चौधरी जानकारी डेलै ।
ओहकान अनुसार गाउँ सभा बैठकसे शहीद दिवसके अवसरमे शहीदहे श्रद्धाञ्जलि डेना निर्णय करल बा । ओस्टके, प्रधानमन्त्री केपी शर्मा ओलीसे प्रतिनिधि सभा विघटन कैना असंवौनिक कार्य रहल गाउँ सभा बैठकसे ठहर करले बा । उ असंवैधानिक कार्य सच्याइक लाग दबाव डेना सर्वसम्मत निर्णय हुइल प्रवक्ता चौधरी जानकारी डेलै ।
ओस्टके, संघ, प्रदेश ओ स्थानीय तीन तहके सरकारबीच कतिपय काममे समन्वय, सहकार्य, ओ सहअस्तित्व कायम नैडेखगैल कहटी गाउँ सभा बैठकसे तीन तहके सरकारबीच समन्वय, सहकार्य, ओ सहअस्तित्व हुइ पर्ना जोड डेहल बा ।
बैठकमे गाउँपालिकाहे थप सुधार कैके आघे बह्रैना ओ अव्यवस्थित बसोबासी, भूमिहीन, सुकुम्बासीहे लालपूर्जा डेना कार्यक्रम आघे बह्रैना सवालमासमेत छलफल हुइल रहे । गाउँ सभा बैठकमे विशेष समय लृेके शुवा परियार, रामकुमार चौधरी, गणेशप्रसाद चौधरी, मुसम्पी चौधरी, प्रेमबहादुर चौधरी, विष्णुप्रसाद चौधरी, कैलाश चौधरी ओ कमलप्रसाद चौधरी बोलल् रहिट ।
बैठकमे गाउँपालिकाके उपाध्यक्ष लक्ष्मी सत्गौंवा थारु, प्रमुख प्रशासकीय अधिकृत खगेन्द्रराज जोशीसहित कर्मचारीहुक्रनके उपस्थिति रहल रहे । गाउँसभाके औरे बैठक माघ २३ गते ११ बजे बोलाइल बा ।
