मुअल बाटि कि जिट्टि बाटि ?
उ हमार बस्टिम छिरल
हमार भासा, संस्कृटि,
ढरमके उँप्पर लाट ट्याकल
हमार उट्पटिक मिठक फ्यारल
अस्टिम्किक, डस्यक मिठक फ्यारल
घोरिघोराहन घोडाघोडी बनाइ अस
माघहन माघि बनाडिहल
हमार मुँ एक अछ्छर नि ब्वालल
कहो हम्र मुअल बाटि कि जिट्टि बाटि ?
लर्का पैलक छ रनौ डिनम
न्वारन कर कहल
छ मैन्हँम भाट खवाइ कराइ कहल
हम्र निकक झार उल्रटि मान्ढर्लि
डेवारिम भाइ टीका लगाइ कहल
माघम निस्राउ डिह छ्वार कहल
थारु बोल्लसे हिह्याइ लागल
आपन भासा ब्वाल कहल
हमार भास बन्ड्यम जरा डिहल
हमार मुँ एक अछ्छर नि ब्वालल
कहो हम्र मुअल बाटि कि जिट्टि बाटि ??
हमार माटि अछ्नल
हमार खुसि अछ्नल
हमार आपन जिन्गि अछ्नल
जसिक हम्र पसनके अछ्नल रठि
उ हमहिन भुँख्ल ढरल अढिकारसे
हम्र एक्चो बोल्लि ट मुँ सि डिहल
हाँठ ग्वारा बाहन्के ढारल
हम्र कुल्यम पठ्रा फँक्बो केल फे
रिस्साके चभ्ल्याङ्ग करट पानी
हम्र मनै होक फे
हमार मुँ एक अछ्छर नि ब्वालल
कहो हम्र मुअल बाटि कि जिट्टि बाटि ?
बर्दिया
