बरघर ओ भलमन्सनहे थारु भिटपटरा वितरण
पहुरा समाचारदाता
देउखर, १७ माघ । थारु कल्याणकारीणी क्षेत्रीय सभा देउखुरी लमहीमे आयोजित एक कार्यक्रममे देउखरके टमान गाउँक अगुवा भलमन्सानहे भिटपटरा हस्तान्तरण कैगैल रहे ।
यिहे माघ १३ गते आयोजित उ कार्यक्रममे सक्कु अगुवनहे अपन अपन गाउँमे जाके भिटपटराके बारेम सक्कु गँवलियनहे जानकारी करा डेहक लग अनुरोध कैगैल रहे । अस्टके थारु कल्याणकारीणी सभा देउखरके सभापति चेतराम चौधरीक कहाई अनुसार यी भिटपटराके मजा प्रतिक्रिया अईटी रलक बटैलै ।
यकर उद्देश्यक लक थारुनके मनाजैना टरटिहुवारमे एकरुपता लन्ना हुईलक ओरसे सक्कु गाउँ गाउँमे पुगैना आवश्यता रलक बटैलै । वहाँ आगे कहलै आबसे थारुनमे टरतिउहारमे कौनो दुविधा नै रही ओ स्थानीय, प्रदेश सरकारसे थारुनके विदा माग कैना फेन सजिल हुई कना बाट बटैलै ।
ओस्टके थारु कल्याण्कारिणी सभा देउखरके महासचिव बाल गोविन्द चौधरीके अनुसार यी भिटपटरा सक्कु जिल्लामे पठैना लक्ष्य रलक बाट बटैलै । देउखरमे सक्कु गाउँक अगुवा, वुद्धिजीवी, शिक्षक, जन्नामन्ना व्यक्तिनके हाथमे यी भिटपटरा जल्दीसे जल्दी पुगैना लक्ष्य लेलक बटैलै । ओ वहाँ अधिकांश गाउँमे थारु भिटपटरा पुगासेक्लक बाट फेन बटैलै ।
ओस्टके माघ ११ गते घोराहीमे थारु कल्याणकारीणी सभा दाङके आयोजनामे हुइल एक कार्यक्रममे बरका पहुना लुम्बिनी प्रदेशके मुख्यमन्त्री शंकर पोखरेलहे थारु कल्याणकारिणी दाङके अध्यक्ष भुवन चौधरी ओ देउखर थारु कल्याणकारीणी सभा क्षेत्रीय सभापति चेतराम चौधरी संयुक्त रुपमे हस्तान्तरण कैले रहिट । उ कार्यक्रममे वक्ता लोग भिटपटराके महत्वके बारेम प्रकाश पर्ले रहिट ।
थारुनके लावा साल माघ १ गतेहे मध्य नजर कैके पुरुव झापासे पश्छिउ कन्चनपुरसमके थारुनके सांस्कृतिक टिउहारहे एकरुपता लन्ना उद्देश्यसे थारु कल्याणकारीणी सभा, देउखरके अगुवाईमे आई एम ग्रुपके सहकार्यमे यी भिटपटरा प्रकाशन कैगिल हो ।
तराईमे थारु समुदायके मनैना तिउहार खास कैके पुरुव, पश्छिउ ओर कुछ फरक फरक रहलेसे फेन यी भिटपटरामे सक्कु ओर मनाजैना टिउहारके तिथिमिति स्पष्ट रुपमे उल्लेख कैगिल बा । भिटपटरा प्रकाशन कैना काममे राप्ती गाउँपालिका, गढुवा गाउँपालिका ओ राजपुर गाउँपालिकाके आर्थिक सहयोग रहल रहे ।
