गैरसंवैधानिक ओ अधिनायकवादके बिरुद्ध आन्दोलन
पहुरा समाचारदाता
धनगढी, १७ माघ । नेपाल कम्युनिष्ट पार्टी (प्रचण्ड–माधव समूह) के अध्यक्ष माधव कुमार नेपाल प्रधानमन्त्री केपी शर्मा ओलीसे करल गैरसंबैधानिक, अलोकतान्त्रिक ओ अधिनायकवादी चरित्रके बिरुद्ध आन्दोलनमे उत्रल बटैले बाटै ।
प्रधानमन्त्री केपी शर्मा ओलीसे संसद बिघटन करल आरोपमे नेपाल कम्युनिष्ट पार्टी (प्रचण्ड–माधव समूह) से धनगढीमे जारी आमसभाहे सम्बोधन करटी पदके हानथाप ओ केपी ओलीके प्रधानन्त्री ओ अध्यक्ष पद खोसक लाग आन्दोलन नैकरल दाबी करटी अध्यक्ष नेपाल केपी ओलीके गैरसंबैधानिक, अलोकतान्त्रिक ओ अधिनायकवादी चरित्रके बिरुद्ध आन्दोलन करल बटाइल हुइट ।
सभाहे सम्बोधनके क्रममे अध्यक्ष नेपालसे कम्युनिष्ट पार्टीके कुसन्तान रहल टिप्पणी फेन करले बाटै । अध्यक्ष नेपाल अहंकारके घोरुवाकमे चहुरके केपी ओली नै सुढरना अवस्था रहल फेन बटैलै ।
ओस्टके उहाँ केपी शर्मा ओलीहे दुर्योधनके संज्ञा डेटी कौरवके बिनाश दुर्योधनके अहंकारका कारण हुइल जस्टे ओलीके अहंकारके कारण ओहकान ओ मतियारहुक्रनके पतन निश्चित रहल बटैलै । उहाँ केपी शर्मा ओलीहे पार्टी चलाइ नैसेकल समेत आरोप लगैलै ।
उहाँ ओलीसे नियुक्त करल केन्द्रीय सदस्य प्रति तिखो टिप्पणी करटी कहलै–‘केपी ओलीके म्यादी केन्द्रीय सदस्यहे मास्क लगाके लाज छोपे सेक्ना अवस्था नैहो । उहाँहुक्रनहे बुर्का लगा डेबी ।’
उहाँ केपी ओलीके गुटमे गैलहुक्रे अब्बे आत्मालोचना करटी आपन पार्टीमे अइलसे स्वागत कैना अन्यथा रामराम कना बाहेक कुछ उपाय नैरहल समेत बटैलै ।
यरसाथे अध्यक्ष नेपाल प्रधानमन्त्री ओलीके कारण निर्मला पन्त न्याय नैपाइल आरोप फेन लगैले बाटै । निर्मला पन्तके बलात्कारी तथा हत्याराहे कारवाहीके लाग अपनेहुक्रे प्रधानमन्त्रीहे घरी घरी कहल मने उहाँ कुछ फेन नैसुनल आरोप लगैलै ।
उहाँ कहलै– ‘निर्मलाके बात केपी ओली सने नैचाहलै । हम्रे घरी–घरी कहली, मने अहँ सुन्ने नै चाहलै ।’
नेपाल कम्युनिष्ट पार्टी (प्रचण्ड–माधव समूह) के औरे अध्यक्ष पुष्पकमल दाहाल प्रचण्ड प्रतिक्रान्ति ओ प्रतिगमनके विरुद्धमे सुदूरपश्चिमके जनता जुर्मराइल बटैले बाटै ।
उहाँ प्रतिक्रान्ति, प्रतिगमनका खतराहे परास्त करक लाग फेनसे सदूरपश्चिमके जनता जुर्मुरैना बाध्य हुइल बटाइल हुइट । आन्दोलनमे सुदूरपश्चिमके जनता आपनहे डेहल साथ डेखके अध्यक्ष प्रचण्ड सुदूर पश्चिमके जनता महान ओ किहुसे नैझुक्ना फेन दाबी करलै । उहाँ सुदूरपश्चिमके जनता मुलुकके राजनैतिक परिवर्तनमे करल बलदानी ओ त्याग प्रशंसीय रहल बटैलै ।
‘सुदूरपश्चिमके जनता महान बाटै,’ प्रचण्ड कहलै– ‘सुदूरपश्चिमके जनताहे कौनो तागतसे झुकाइ नैसेकी । इ सन्देश मै संसारभर लैजैबु ।’
यकर साथे अध्यक्ष प्रचण्ड धनगढी आइलपाछे प्रधानमन्त्री ओलीके बह्रल फूर्ति ओ घमण्डहे विरोध सभामे सहभागी जनताहुक्रे चकनाचुर पार डेहल बटैलै ।
सम्बोधनके क्रममे उहा माधव नेपालसंग लोकतन्त्र ओ प्रजातन्त्रके लाग सहकार्य करल झण्डे ४० बरस हुइल ओ आपनहुक्रनके सम्बन्ध लावा नैरहल स्पष्ट परलै । दाहालसे सशस्त्र संघर्षके क्रममे फेन नेपालमे गणतन्त्र स्थापनाके लाग माधव नेपाल ओ आपन बीच सहकार्य हुइल बटैलै ।
दाहाल तीन बरसआघे ओलीसे नेकपाके गठबन्धन ओ एकताके प्रस्ताव अपने लैगिल मने उहाँ सकारात्मक नैरहल बटैलै । उहाँ कहलै– ‘पाछे प्रधानमन्त्री बनाब कहलपाछे किल ओली सकारात्मक हुइलै । ओ पार्टी एकिकरण हुइल ।’
सम्बोधनके क्रममे अध्यक्ष प्रचण्ड केपी ओली दलाल ओ ओह्कान पाछे लगुइया लेखराज भट्टहे दलालके फेन दलाल रहल आरोप लगैलै । अध्यक्ष दाहाल भट्टहे अपने बह्राइm ओ नेता बनाइल दावी करटी भट्टहे दलालके संज्ञा डेलै ।
मोर बनाइल अपनेहुक्रनके नेता दलालके फेन दलाल होगैलै । दाहाल लेखराज भट्टप्रति लक्षित करटी कहलै–‘केपी ओली दलाल हुइट । लेखराज टे आउर दलालके फेन दलाल हुँइट ।’
हमार कौनो फेन संघरिया उ दलालके पाछे नैलग्लै । ९५ प्रतिशत संघरिया हम्रहीनहे साथ डेले बाटै । उ दलालन्के भण्डाफोर करटी रहल बाटै ।
विरोध सभाहे सम्बोधन कैटी नेपाल कम्युनिष्ट पार्टी (प्रचण्ड–माधव समूह) के सुदूरपश्चिम ईञ्चार्ज भीम रावल प्रधानमन्त्री ओली अपनहे हस्ताक्षर करल संबिधान कुल्चल आरोप लगैलै ।
नेता रावल प्रधानमन्त्री ओली संसद बिघटन कैके संबिधान बिघटनसंगे नेकपाहे बिसर्जन करे खोजल समेत आरोप लगैलै । उहाँ प्रधानमन्त्री ओलीहे राष्ट्र ओ राष्ट्रियता बिरोधी कार्य कैनासे अपने रोकल बटैलै । उहाँ ओली संसद, स्थायी कमिटि, नेकपाके केन्द्रीय कमिटिसे भागल बटैटी ओली एक नम्बरके भौगडा समेत रहल बटैलै ।
उहाँ अपने १९ बरसके उमेरमे केन्द्रीय कारागारमे रहल बेला ओली २३ बरसके लवण्डा रहल चर्चा कैटी कहलै– ‘महिन लवण्डा कहरुइया ओली सिंहदरवारसे हेरिट, आज इहे लवण्डा सिंहदरवारहे हिलैले बा, इहे लवण्डा पार्टीके दुई नेताहे सुदूर पश्चिम लन्ले बा ।’
उहाँ प्रधानमन्त्री ओलीहे ओम्नी ओ यति समूहहे पोसल ओ औषधीमे समेत भ्रष्टाचार करल आरोप लगैलै ।
पार्टीके सहईञ्चार्ज खगराज भट्ट सिंह दरवारमै बैठके शासक बौँराइल बटैले बाटै । सहईञ्चार्ज भट्ट प्रधानमन्त्री ओलीहे अरिगांलके संज्ञा डेटी अरिगांल कट्ना किल काम कैना हुइल ओरसे अरिगांलनहे परास्त करे पर्ना बटैलै । उहाँ नेपाली काँग्रेसके नेताहुक्रनहे तुलसी गिरीके पक्षमे लाग्न कि गिरिजा प्रसाद कोईरालाके डगरामे लग्ना प्रष्ट हुइना आग्रह फेन करलै ।
संबिधानके रक्षा ओ गैरसंबैधानिक कदमके बिरोधमे उट्रक लाग नेपाली काँग्रेसके नेता तथा कार्यकर्ताहे उहाँ आग्रह करलै । उहाँ प्रधानमन्त्री ओलीसे कैना निर्बाचनमे विश्वास नैकरे पर्ना आग्रह कैटी चुनाव कौनो हालतमे फेन नैहुइना ठोकुवा करल रहिट ।
सुदूरपश्चिमके मुख्यमन्त्री त्रिलोचन भट्ट अदालतसे संसद पुनस्र्थापना नैहुइलेसे सडकसे हुइलसे फेन पुनस्र्थापना कैना ठोकुवा करल रहिट ।
मुख्यमन्त्री भट्ट नेकपा नै फुटल दाबी कैटी नेकपा एकताबद्ध हुइल बटाइल रहिट । उहाँ प्रधानमन्त्री ओलीसे संसद बिघटनसंगे संबिधान बिघटनके कोसिस फेन करटी रहल बटैलै ।
धनगढीके खुलामञ्चमे हुइल विरोध सभामे प्रदेशके नौ जिल्लाके गाउँ–गाउँ आइल हजारौं नेता कार्यकर्ता तथा सर्मथकहुक्रनके सहभागिता रहल रहे ।
