ओरेक नेपालसे परियोजनाबारे जानकारी

पहुरा समाचारदाता
चौमाला, १८ माघ । ओरेक नेपालसे गौरीगंगा नगरपालिकामे करे लागल कार्यक्रमबारे जानकारी करागिल बा ।

गौरीगंगा नगरपालिकामे अइना तीन बरषसम कैजिना गतिविधिबारे जानकारी ओरेक नेपालके कार्यकारी निर्देशक लुभराज न्यौपाने जानकारी डेहल रहिट । उहाँ ओरेक नेपालसे देशके १९ जिल्लामे गतिविधि संचालन करल जानकारी डेहल रहिट ।

ओरेक नेपालसे स्थानीय तहमे प्रभावकारी रणनीति ओ कार्ययोजना निर्माण करके बालिका तथा महिला उप्पर हुइना हिंसा न्यूनिकरण, प्रभावकारी सेवा प्रदान ओ हिसा प्रभावितके न्यायमे पहँुच सुनिचितत कैना स्थानीय स्तरके जवाफदेहिता अभिबृद्धि कैना, लैङिक हिंसा न्युनिकरणके लाग हिसा प्रभावितहे सरक्षण प्रदान कैना, जनचेतना अभिबृद्धि कैना ओ महिला समुह, मानव अधिकारकर्मी, स्थानीय सामुदायिक संघसंस्थाके प्रतिनिधि, युवा समुहसंग सहकार्य करके हानिकारक सामाजिक प्रथा न्यूनिकरण कैना, हानिकारक सामाजिक मुल्य मान्यता विश्वास ओ अभ्यास विरुद्ध काम कैना, प्रभावितके सामाजिक एकिकरण प्रक्रियामे सहयोग पुगैना समुदायके व्यक्ति किशोर किशोरी यूवाविच सामुहिक सचेतना बृद्धि कैना मेरिक करिब २४ ठो गतिविधि संचालन कैना कार्यकारी निर्देशक जनैलै ।

नगर प्रमुख भीम देउवाके वडका पहुनामे हुइल कार्यक्रमे उहाँ भौतिक पूर्वाधारके विकास ढेर हुइल ओरसे आब सामाजिक ओ सांस्कृतिक विकास आवश्यक रहल बटैलै । सरकारसे समृृद्ध नेपाल, सुखी नेपालीके नारा लेके आघे बह्रल बा, उहाँ कहलै, – ‘सरकारी सेवाके पहुँचसे बाहेर रहुइयाहे आर्थिक सुनिश्चितासे जोरे सेक्लेसे केल नारा सार्थक पाई ।’ सुविधा सम्पन्न व्यक्तिसेफे गरिबीके रेखा टरे रहल व्यक्तिनहे सरकारके आवश्यकता पर्ना उहाँ बटैलै । ओरेक नेपालसे जिल्ला स्तरीय महिला पुनःस्थापना गृह गौरीगंगामे बनैना कहल ओरसे नगरपालिकासे हुइना सहयोगमे कमी नइरख्ना नगर प्रमुख देउवा बटैलै ।

नगर उपप्रमुख अञ्चला चौधरी जिल्ला स्तरीय महिला पुनःस्थापना गृह संचालन कैना हुइलपाछे मापदण्ड अन्सार संचालन करेपर्ना बटैली । ‘ओरेक नेपालसे संचालन करल महिला सेभ हाउस अदालतके डुवारसम जैना डगर खोलठ,’ उहाँ कहली,–‘गौरीगंगामे सेभ हाउस सचालन हुइना खुशीक बाट हो, यम्ने सक्कु जे सकारात्मक सोचके साथ आघे बह्रे परल ।’ गौरीगंगामे बन्ना महिला पुनःस्थापना गृहहे नमूना बनैना उहाँ प्रतिवद्धता जनैली ।

वडा नम्बर ४ के अध्यक्ष भागरथी विष्ट गौरीगंगामे स्थापना हुइना महिला पुनःस्थापना गृहके स्तरोत्तरीके साथे द्वन्द्व प्रभावितहे समेटके लैजैना सुझाव डेली । मानसिक समस्याके कारण महिला हिंसाके घटनाके बढनाके साथे आत्म हत्याके घटना बह्रल ओरसे मनोसामाजिक विमर्शके आवश्यकता रहल अध्यक्ष विष्ट कहली ।

वडा सदस्य हंसराज नेपाली गौरीगंगा नगरपालिकामे युवाहुक्रे विग्रटी गैल ओ हानिकारक परम्परा विरुद्ध सचेतनाके कार्यक्रममे जोड डेहल रहिट ।

कार्यक्रम ओरेक नेपालके अध्यक्ष रामवती चौधरीके अध्यक्षतामे हुइल रहे कलेसे संचालन ओरेक नेपालके कैलालीके जिल्ला संयोजक विनुराना जोशी करले रहिट । ओस्टेक गौरीगंगा नगरपालिका ओ घोडाघोडी नगरपालिकामे संचालन हुइल यूवा सूचना केन्द्रके अनुगमन करल रहे । कार्यक्रममे ओरेक नेपाल कैलालीके जिल्ला कार्यक्रम अधिकृत गीता चौधरी सहजीकरण करल रहिट ।