थारु मन्जुरियन ओ पेशागत सुरक्षा

१० महिने लम्मा लकडाउन पाछे गृह मन्त्रालयसे सिमा नाका आवटजावट १६ माघसे खुला कइ गइल बा । गइल बरसके चैत १० गतेसे सिमा नाका बन्द रहे । ओसिन टे लकडाउनके समयमे औरे देशसे अपन देश घुमल पाछे अपने देशमे रोजगारी खोज्ना कामेम बहुट जाने लागल बटाँ । काजेकि विदेशओरिक अवस्था फेन अभिन ठिक नइ हो ।

मने सुदूरपश्चिम प्रदेशके भारतसे जोरल गौरीफन्टा नाका हुके अउइयासे फे नेपालसे जउइयनके संख्या ढेर बा । इ नाकासे भारत जउइयनके संख्या रोटडिन हस १ हजारसे १५ सय रहल सशस्त्र प्रहरी प्रशासन जनैले बा । भारत लगायत देशमे कमाइ जैना अनुहार प्रायः पहाडी अनुहार डेखाइठ । मने आब ढिरे ढिरे थारु समुदायके मन्जुरियनके गन्तव्य फेन भारत देश डेखाइ परटा । अइसिनमे औरे देशमे पेशागत सुरक्षा का कसिन बा ? मन्जुरियन ख्याल करक चाहि । बहुट जे बिना कन्टे«क्टके काम कर्ठा, जिहिसे मलिक्वन पहिले ढेर सुनाके पाछे मनमानि कइके ठन्चे रकम डेठाँ ।

ओसिन टे अपने देशमे काम कर्टि रहल थारु मन्जुरियनके फेन पेशागत सुरक्षा नइ हो । आजकल काठमाडौं लगायत बहुटसे सहरमे थारु मन्जुरियन घर बनैना कामेम लागल डेखजाइठ । सिपमुलक कामेम कमाहि ढेर बा, मने ओसिन कामेम जोखिम फेन बहुट बा । घर बनैना कामेम ठेकदार बिना कन्टे«क्टके काम करैठाँ । डसौं टल्लाके उपर काम करेबेर गिरके चोटपटक लग्ना किल नाहि मुना सम्भावना फेन ढेर रहठ । मने कोनो मन्जुरियनके जिवन विमा करल नइ रहठिन । ओहेसे बहुट जे अपांग होके घरे बैठे पर्ना, डवाइ पानीमे अपने खर्चा करे पर्ना अवस्था बटिन ।

आजकल कोनो फे अफिसके कामेम सम्बद्ध हुइलेसे जिवन विमाके सुविधा रहठ । ओहेसे काम छोट होए या बरा । काम अपने देशमे होए या विदेशमे । मन्जुरियन जिवन विमा रहल नइ रहल चिल्वास करक चाहि । अकस्मातके दुर्घटनामे मुँउइया मनै टे छुट्टि पा लेठाँ, मने डुख डुख्वास जियल घरक मनैनमे परठ । जे फे डुख कइलेसे सुख जरुर खोजठ । अपन परिवारके सुखके लग फेन मन्जुरियन अपन काम कैना ठाउँमे जिवन विमाहे अनिवार्य शर्त बनैना चाहि ।

कमैना किल बरा बाट नइ हो, वचत कर्ना बरा बाट हो । मन्जुरियनके कमाइ ठोर रहे या ढेर । नियमित बचत कर्ना बान बैठैलेसे ढेर योजना बनाइ सेक्जाइठ । गाउँघरम खुलल् टमाम वचत सहकारीमे वचत कइके मन्जुरियन फाइदा लेहे सेक्ठाँ ।