कक्षा १२ के नतिजा सार्वजनिक

काठमाडौं, १९ माघ । राष्ट्रिय परीक्षा बोर्ड, परीक्षा नियन्त्रण कार्यालयसे कक्षा १२ के नतिजा सार्वजनिक करले बा । परीक्षा बोर्डके सोम्मारके निर्णयअन्सार परीक्षाफल प्रकाशित करल हो । बोर्डसे कोरोनाके कारण निर्धारित वार्षिक तालिकासे ढिला करके अगहनमे ओ संक्रमित परीक्षार्थीहुकनके पुस महिनामे परीक्षा सञ्चालन करल रहे ।

परीक्षामे नियमितओर ३ लाख १० हजार ३१६ जाने ओ ग्रेडवृद्धिओर ९१ हजार ९०० तथा आंशिकओर ३१ हजार ५५ करके कुल ४ लाख ३३ हजार २७१ जाने सहभागी हुइल रहिट । जेम्ने आंशिकओर १ जानेक परीक्षा रद्द कैनाके साथे कुल ११ हजार ४९० जानेक परीक्षा स्थगित करल बा ।

कक्षा ११ के प्राप्तांक नइहुइल ओ कक्षा १२ के आन्तरिक मुल्यांकनके अंक प्राप्त नइहुइल परीक्षार्थीहुकनके सम्बन्धित विषयके परीक्षाफल स्थगित करल बोर्डसे जनैले बा । परीक्षा स्थगित हुइल परीक्षार्थीके विवरण बोर्डके बेबसाइटमे हेरे सेक्जाई । ओस्टेक परीक्षा बोर्डके वेबसाइट www.neb.gov.np, neb.ntc.net.np/results लगायत एसएमएस सर्भिस ओ आईभीर सर्भिसलगायतसे हेरे सेक्जाई ।