सुदूरपश्चिम स्पोर्टस अवार्डहे नोभाके साथ

पहुरा समाचारदाता
धनगढी, १९ माघ । धनगढीमे हुइना डुसरा सुदूरपश्चिम स्पोर्टस अवार्डहे धनगढीमे रहल नोभा अस्पतालसे साथ डेले बा ।

नेपाल खेलकुद पत्रकार मञ्च कैलालीसे आयोजना कैना स्पोर्टस अवार्डमे डेना ९ विधा मन्से वर्ष खेलाडी महिला विधाहे नोभासे प्रायोजन करल हो । आब यी विधाके नाम नोभा अस्पताल बर्ष खेलाडी महिला अवार्ड रही । यी विधाके विजेताहे नगद ३० हजार सहित ट्रफी ओ मेडल प्रदान करजाई । विधा प्रायोजन सम्बन्धी सम्झौता पत्रमे नोभा अस्पतालके प्रशासन अधिकृत सुमन भट्ट ओ अस्पतालके मेसु डाक्टर रामविहारी चौधरी तथा नेपाल खेलकुद पत्रकार मञ्च कैलालीके सदस्य गगन अयडी हस्ताक्षर करलै ।

चैत ६ गते आयोजना हुइना अवार्डके डुसरा संस्करणमे २०७६ सालभर उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक करके टमान ९ विधामे अवार्ड डेना खेलकुद पत्रकार मञ्च कैलालीके सदस्य तथा खेलाडी छनोट समितिके सदस्य नवराज पनेरु जानकारी डेलै ।

उत्कृष्ट खेलाडी पुरुष ओ महिला, उत्कृष्ट प्रशिक्षक, पिपल्स च्वाइस अवार्ड करके ४ विधाके विजेताहे नगद ३० हजार सहित ट्रफी मेडल, प्रमाणपत्र, वर्ष युवा खेलाडी, स्पेसल अवार्ड, लाईफ टाइम एचिभमेन्ट अवार्डके विजेताहे नगद २५ हजार सहित ट्रफी मेडल, प्रमाण पत्र डेना जनागिल बा ।