‘लोकतन्त्रके गहनाउप्पर प्रहार’

पहुरा समाचारदाता
धनगढी, १९ माघ । नेपाली काँग्रेसके महासमिति सदस्य तथा पूर्व राज्यमन्त्री जनक चौधरी कम्युनिष्ट सरकार लोकतन्त्रके गहना उप्पर प्रहार करल बटैले बटै ।

कम्युनिष्ट सरकारसे करल प्रतिनिधिसभा विघटनके विरोधमे सोम्मारके रोज धनगढीमे निकारल विरोध कार्यक्रममे बोल्टी उहाँ कम्युनिष्ट सरकार संविधानहे लटयइना काम करल बटैलै । ‘लोकतन्त्रके गहना कहलेक संसदीय प्रणाली, संसदीय व्यवस्था हो,’ उहाँ कहलै, ‘केपी ओली नेतृत्वके सरकार संसदीय प्रणाली उप्पर कुठाराघात करले बा, संविधानके हत्या कैना काम करले बा ।’

उहाँ कहलै, ‘२०७० सालके चुनावके बेला जनताहुकन हम्रे कहले रही, कम्युनिष्टहे जिटैबो टे लोकतन्त्र उप्पर करही, आज उहे हुइल बा ।’ कम्युनिष्ट सरकारके बेथितिके कारण राजवादी फेरसे सडकमे सलबलाई लागल महासमिति सदस्य तथा पूर्व राज्यमन्त्री चौधरी बटैलै ।

नेपाल महिला संघके केन्द्रीय सदस्य तथा धनगढी उपमहानगरपालिकाके नगर उपप्रमुख सुशीला मिश्र भट्ट लोकतन्त्र धाराप परटी रहल ओरसे उहीहे बचाइक लाग नेपाली काँग्रेस आज सडकमे आइपरल बटैली । ‘नेपाली काँग्रेस लोकतन्त्रहे जलमैले बा, पुनःस्थापना करले बा,’ उहाँ कहली–‘एक ठो जिम्मेबार पार्टी हुइलक ओरसे लोकतन्त्रके रक्षा करेक लाग सडकमे अइना पर्ना बाध्य हुइल बा ।’

कम्युनिष्टहुकनके गतिविधि ढेर हेरगैल मने असवैधानिकके विरुद्ध चुपके बैठे नइसेक्ना उहाँ कहली । सर्वोच्च अदालतसे कैना निर्णयहे अशरा लागल मने चुनाव नइहुइलसे कदपी चुप नइबैठना केन्द्रीय सदस्य मिश्र भट्ट बटैली ।

नेपाली काँग्रेसके महाधिवेशन प्रतिनिधि तथा नेपाल तरुण दलके केन्द्रीय सदस्य गोपाल देउवा नेपाली काँग्रेस विधिविधान मानके आघे बह्रल मने कम्युनिष्टहुक्रे विधिविधानहे ओरवाई खोजल आरोप लगैले बटै । उहाँ कहलै, ‘कम्युनिष्ट सरकार बामदेव गौतम, नारायण काजी श्रेष्ठहे राष्ट्रिय सभामे नानेबारे विधिविधान मिच सेक्ले रहे, भ्रष्ट सरकारके अतिवादके हिसावकिताव नेपाली काँग्रेस एक–एक करके ढरले बा ।’

नेपाली काँग्रेस कैलालीके जिल्ला सचिव पूर्ण कुवँर केपी नेतृत्वके कम्युनिष्ट सरकार जनताके विश्वास उप्पर घाट करल बटैलै । उहाँ कहलै, जनता अभिमत डेके सरकारमे पठाइल, मने कम्युनिष्ट सरकारहे दुई तिहाई नइपचल कारण सांसद नइबचल ।’ नेपालके संविधानमे प्रधानमन्त्रीहे प्रतिनिधि सभा विघटन कैना कौनो अधिकार नइडेलेसेफे अधिनायकबाद, निरंकुश सरकार असंवैधानिक कदम चलल उहाँ कहलै । संविधानके रक्षा कैना नेपाली काँग्रेस जबफे तयार रहल कहटी सर्वोच्च अदालतसे जनताके पक्षमे निर्णय नइकरलेसे आन्दोलनके आँधीवेरी नन्ना उहाँ चेतावनी डेहल रहिट ।

नेपाल तरुण दल कैलालीके जिल्ला अध्यक्ष दीपेन्द्र बम कोरोनाके कारण सक्कु क्षेत्रके अवस्था कम्जोर रहल बेला केपी ओली नेतृत्वके सरकार देशमे चुरलुम्म डुवाइल बटैलै । उहाँ कहलै, कोरोनाके कारण करोडौ यूवाके रोजगारी गुमल, किसान मलखाद नइपाइल अवस्था बा, मने कम्युनिष्ट सरकार अपन स्थार्थ तत्तलिन बा ।’ नेपाल काँग्रेस सदैव लोकतन्त्रके लाग अवाज उठैटी आइल ओरसे केपी सरकार राजीनामा डेके देशमे शान्ति अमन नइनानटसम आन्दोलन जारी रख्ना जिल्ला अध्यक्ष बम बटैलै ।

नेपाली काँग्रेसके टमान भातृ संगठनके संयूक्त आयोजनामे हुइल विरोध र्‍याली तथा कोणसभा नेपाल रष्ट्रिय मगर संघके अध्यक्ष नेत्र मगरके अध्यक्षतामे हुइल रहे । कार्यक्रममे स्वागत नेपाल महिला संघके जिल्ला अध्यक्ष पुष्प भट्ट ओ संचालन नेपाल विद्यार्थी सघके भेष बम करले रहिट ।

धनगढीके ट्राफिक चौराहासे पार्क चोकमे हुइल र्‍याली तथा कोणसभा नेपाल महिला संघ, नेपाल तरुण दल, नेपाल रष्ट्रिय मगर संघ, नेपाल विद्यार्थी सघ, मुस्लिम संघ लगायत भातृसंगठनके संयूक्त आयोजनामे हुइल रहे ।