ठाकुरबाबासे बरघरहुकन कानूनी मान्यता डेना
पहुरा समाचारदाता
बर्दिया, २२ माघ । ठाकुरबाबा नगरपालिकासे बरघरहुकन कानूनी मान्यता डेना जनैले बा ।
ठाकुरबाबा नगरपालिकाके बडघरहुकनके क्षमता विकासके लाग भुरीगाउँमे हुइल अभिमुखीकरण कार्यक्रममे ठाकुरबाबा नगरपालिकाके नगरप्रमुख घननारायण श्रेष्ठ बरघरहुकन कानूनी मान्यता डेना बटाइल रहिट ।
कार्यक्रमके बर्का पहुना रहल उहाँ ठाकुरबाबा नगरपालिकासे बरघरहे कानूनी मान्यता डेना बाटके उठान पहिल बार करल ओरसे अपने ढिला हुइल बटैलै । बरघरहे पहिल बार कानूनी मान्यता डेहलमे बारबर्दिया नगरपालिकाहे धन्यवाद डेटी ठाकुरबाबा नगरपालिकासे बरघरहुकनके सुझाब सहित उत्कृष्ट ऐन बनाके बरघरहुकनहे कौनोफे असर नइपर्ना करके कानूनी मान्यता डेना बटैलै ।
औस्टेक उहाँ आदिबासी जनजाति महासंघ नगर समन्वय परिषद, ठाकुरबाबा नगरपालिकाके अध्यक्ष भिखु थारुके संयोजकत्वमे महिला तथा बालबालिका कल्याण उपशाखाके प्रमुख रीता थारु सदस्य सचिब ओ ठाकुरबाबा नगर स्तरीय बरघर सन्जालके अध्यक्ष बुधराम सदस्य रहना करके तीन सदस्यीय समिति उद्घोष करके निर्णय समेत करैले बटै ।
ठाकुरबाबानगरपालिकाके उपप्रमुख कृष्ण कुश्माथारु बरघरहुकनहे अनुगमनकर्ताके रुपमे ढरटी कानूनी मान्यता डेना अपने तयार रहल बटैली ।
ठाकुरबाबा नगरपालिका बरघर सन्जालके अध्यक्ष तथा बरघर बुधराम थारु सरकारी ओ गैर सरकारी निकायसे बडघरहुनहे बेठबेगारीके काममे लगैना, सहभागी जुटैनामे सहयोग मग्ना मने विकास निर्माण ओ निर्णायक तहमे सहभागी नइकराइल गुनासो पोख्लै ।
बडघर फे अपन अधिकार प्राप्तिके लाग सशक्त हुई पर्ना बटैलै । मनै जटरा भारी पदमे पुगे मने ओकर लास उठाई गाउके समुदाय ओ बरघर चहना ओरसे सक्कु जे बरघर प्रणालीहे सहयोग करे पर्ना जिकिर करलै ।
बडघर सन्जाल ठाकुरबाबा नगरपालिकाके सल्लाहकार मोहन थारुले बरघरहुकनके क्षमता विकासके लाग माइन्युट लेखन, लेखाविधी ओ दस्तावेजीकरण जैसिन अत्यावश्यक तालिम डेहे पर्ना बटैलै ।
ओस्टेक करके, थारुनसे बरघर गाउँमे केल सिमित नइहुके वडा अध्यक्ष ओ नगर प्रमुखके तह सम्म पुग्न क्षमता बढाई पर्ना बटैलै ।
कार्यक्रमके सभाध्यक्ष एवं आदिबासी जनजाति महासंघ नगर समन्वय परिषद, ठाकुरबाबा नगरपालिकाके अध्यक्ष भिखु थारु नगरपालिकाके समग्र विकास कैना बा कलेसे थारु समुदायके विकास अनिवार्य रहल बटैलै । थारु समुदायके विकास विना नगरपालिका अपाङ्ग सरह हुइना जिकिर करलै ।
ओस्टेक करके उहाँ बरघर थारु समुदाय पहिचान डेना प्रणाली रहल कहटी अबके बरघर आधुनिक विचारवान ओ बौद्धिक हुई पर्नाफे आग्रह करलै । जेकर सवाल हो उहे नेतृत्व करे पर्नाफे थारु अनुरोध करलै ।
थारु समुदायमे बरघर प्रणालीमे रहल बरघर ओ चौकीदारके क्षमता विकासके लाग आयोजना करल उ कार्यक्रमके सहजीकरण मानव अधिकारकर्मी सोम डेमनडौरा करले रहिट । ५० से ढेर बरघर ओ चौकीदारहुकनके सहभागितामे हुइल उ कार्यक्रम आदिबासी जनजाति महासंघ नगर समन्वय परिषद, ठाकुरबाबा नगरपालिकाके समन्वय ओ ठाकुरबाबा नगरपालिकाके आयोजनामे सम्पन्न हुइल हो ।
ठाकुरबाबा नगरपालिकाके बडघरहुकनके क्षमता विकासके लाग एक दिने अभिमुखीकरण कार्यक्रममे बरघरके पृष्ठभूमी, वर्तमान अवस्था ओ सवाल, बडघरके भूमीका आृ जिम्मेवारी, बरघर प्रणाली संरक्षण ओ प्रवद्र्धनमे स्थानीय तहके दायित्व लगायतके विषयमे अभिमुखीकरण करल रहे ।
ओस्टेक यिहीसे पहिले बारबर्दिया बरघर प्रणलीहे कानूनी डेसेक्ल बा ।
बारबर्दिया नगरपालिकाके क्षेत्रभिटर रहल टोल बरघर संस्थाहे परिचालन कैना बनल ऐन २०७७’ बारबर्दिया नगरपालिकाके आठौँ नगरसभासे सर्वसम्मत रुपमे पास करल बा । थारु समुदायमे रहल बरघर प्रथाहे कानूनी मान्यता डेके थारु समुदायमे रहल परम्परागत संस्था बडघर प्रथाहे व्यवस्थित करेक लाग बारबर्दिया नगरपालिकासे ऐन बनैले बा ।
नगरपालिकासे नानल ऐनमे बरघरके चयन, ओइनके कार्यक्षेत्र, कामकर्तव्य अधिकार, मर्यादा लगायतके बाट समेटल बा, बरघरसे अपन कार्यक्षेत्रमे नेपाल सरकारके प्रचलित ऐन नियमके विपरित नइहुइना करके करे पर्ना उल्लेख करल बा ।
ऐनमे नगरपालिकाके जनप्रतिनिधिहुकनसंग समन्वय कैना, गाउँमे रहल छोट–छोट झै झगडा समाधान कैना, गाउँ टोलमे आइल जैैसिनफे काममे सक्रिय सहभागिता जनैना लगायत समुदायमे सामाजिक साँस्कृति आर्थिक सद्भाव कायम रख्न कार्य वडघरके काम कर्तव्य अधिकारभिटर रहल नगर प्रमुख दुर्गाबहादुर थारु जनैले बटै ।
उ ऐनमे बरघर प्रथामे कायम रहना सहायक बरघर ओ चौकीदार समेतके काम कर्तव्य अधिकारके बारेमेफे उल्लेख करल बा । सहायक बरघरके कार्य बडघरके अनुपस्थितिमे गाउँके नेतृत्व कैना ओ चौकीदारके कार्य गाउँमे आवश्यक सूचना प्रवाह करे पर्ना उल्लेख करल प्रमुख थारु बटैलै ।
