हत्याके विरोधमे नेविसंघ आन्दोलित

पहुरा समाचारदाता
धनगढी, २३ माघ । दोगडाकेदार गाउँपालिका–७, चडेपानीके १७ वर्षिया भागरथी भट्टके हत्याके विरोधमे नेपाल विद्यार्थी संघ कैलाली शुकके रोजसे आन्दोलित हुइल बा । भागरथी उप्पर यी क्रूर अमानवीय घटनाके विरुद्ध न्याय प्राप्तीके लाग आन्दोलित हुइल हो ।

संघके अध्यक्ष भेष बमसे हस्तक्षरित विज्ञप्तिमार्फत आपराधिक घटनाके दोषीके तत्काल पहिचान करके हदैसमके कानूनी कारवाही ओ पीडिट परिवारहे तत्काल न्याय सुनिश्चिता कैना माग करल बा ।

‘बालिकाके बलात्कारसंगे हत्याके यी घटना पहिल नइहो,’ विज्ञप्तिमे कहल बा– ‘अइसिन गम्भीर प्राकृतिके अमानवीय ओ पीडादायी घटना बार–बार घट्टी जैना ओ दोषी राज्यके कम्जोरीके कारण उन्मुक्ती पैटी गैल बा ।’ हत्या, हिंसा जैसिन घटना घट्टी जैना मने वर्तमान सरकार नागरिकके बाँचे पैना नैसर्गिक हकके रक्षा कैनामे असफल हुइल संघसे विज्ञप्तिमार्फत आरोप लगागिल बा ।

वर्तमान ओली सरकारके सत्तालिप्त ओ असफल कार्यशैलीके कारण अइसिन घटनासे अइना दिनमे प्रश्रय पैटी जैना, ठप भगरथी अस्टे करके ज्यानके आहुती डेहे टे नइपरी ? ओली सरकारके कार्यशैलीके कारण हम्रहिनहे यी चिन्तासे पिरोल्ले बा, यहोर सजग हुइना नेपाल विद्यार्थी संघ विज्ञप्तिमार्फत आग्रह करले बा ।

बैतडीके दोगडाकेदार गाउँपालिका–७, चडेपानीके १७ वर्षिया भागरथी भट्ट बिफेक साँझ मृत भेटल रहिट । उहाँक शव स्थानीय लवलेक बनुवामे विभत्स अवस्थामे फेला परल मृतकके आफन्त शिवराज भट्ट जानकारी डेलै ।

बुधके घरसे विद्यालय गैल ओ घर नइलौटलपाछे खोजी करटी जाईबेर बिफेक साँझ ५ बजेओर भट्टके शव हत्या करके फेकल अवस्थामे फेला परल रहे । उहाँ कहलै, ‘मृतकके शरीरभर निलडाम ओ घाउ रहल बा, कपडाफे चिठल अवस्थामे बटै ।’ उ लउण्डी बुधके रोज विद्यालयमे उपस्थित रहल ओ ओकरपाछे घटना हुइल हुई सेक्ना सनातन धर्म माविके प्रधानाध्यापक बलदेव नाथके कहाई बा । उहाँ कहलै, ‘घटना बहुट दुःखद् बा, घटनामे संलग्नहे आवश्यक कारवाही हुई परल ।’

घटनास्थलके प्रकृति हेरेबेर शंकास्पद रहल घटनास्थलमे खटल खोचलेक प्रहरी चौकीके प्रमुख मोती बम जानकारी डेलै ।

घटनाहे गम्भीररूपमे लेहल ओ दोषीहे कानूनी कठघरामे नन्ना बैतडीके प्रहरी प्रमुख एंव प्रहरी नायब उपरीक्षक नारायणप्रसाद अधिकारी बटैलै ।