टिसरा अध्यक्ष रनिङ्ग कप प्रतियोगिता
पहुरा समाचारदाता
धनगढी, २४ माघ । कैलारी स्मार्ट समन्वय यूवा क्लब कैलालीके आयोजनामे हुइ लागल टिसरा अध्यक्ष रनिङ्ग कप–२०७७ के तयारी पुरा हुइल बा ।
काल्ह माघ २५ गते सकारे साढे ९ बजे कैलारी गाउँपालिका वडा नं ३, उत्तरभड्री गाउँपालिकाके खेलकुद विकास समितिके खेल मैदान उद्घाटन हुइना प्रतियोगिताके सक्कु तयारी पुरा हुइल आयोजक क्लबके अध्यक्ष ज्ञानबहादुर चौधरी जानकारी डेलै ।
कैलारी गाउँपालिकाके आर्थिक सहयोग ओ पुष्पलक्ष्मी कन्सट्रक्सन एण्ड सप्लायर्स प्रालिकाके मुख्य प्रायोजनमे हुइना प्रतियोगिताके उद्घाटन गाउँपालिका अध्यक्ष लाजुराम चौधरीसे हुइना जनाइल बा ।
प्रतियोगितामे पुरुष फुटबल डे–पेनान्टी सुटआउट, भेट्रान पुरुष फुटबल ओ ब्याडमिन्टन प्रतियोगिता रहल बा । पुरुष फुटबल डे–पेनान्टी सुटआउट प्रतियोगिताके लाग प्रथम पुरुस्कार नगद १ लाख ओ द्धितिय पुरुस्कार नगद ५० हजार रहल जनाइल बा ।
ओस्टके भेट्रान पुरुष फुटबल प्रतियोगितामे प्रथम हुउइया टीम नगद ६० हजार सहित ट्रफि, मेडल ओ प्रमाण पत्र ओ द्वितिय पुरुस्कार नगद रु ३० हजार सहित ट्रफि, मेडल ओ प्रमाण पत्र प्रदान करजैना जनाइल बा ।
ब्याडमिन्टन प्रतियोगितामे प्रथम हुउइया टीम नगद रु ५० हजार प्राप्त कैना बाटै कलेसे द्वितिय हुउइया टीम नगद २५ पुरुस्कार प्राप्त कैना आयोजक जनैले बा । प्रतियोगिताके अवसर पारके फागुन ६ गते वृहत रक्तदानके कार्यक्रम फेन रहल आयोजक क्लबके सल्लाहकार बतासु चौधरी जानकारी डेलै ।
ओस्टके प्रतियोगिता संगे सांस्कृतिक झाँकी, सांस्कृतिक कार्यक्रम फेन रहना क्लबके सल्लाहकार समिति सदस्य एवं मिडिया संयोजक मिशन चौधरी जानकारी डेलै ।
सांस्कृतिक कार्यक्रममे थारु लोक गायक मनिराम चौधरी, गायक राजु भुजेल, मोडल अन्जना चौधरी, वितिसा दहित, हास्यकलाकार सत्यनारायण फेँटारा लगायत कलाकारहुक्रनके वेजोड प्रस्तुति रहना जनाइल बा ।
