आन्दोलन सफल बनैना संगठित आवश्यक
पहुरा समाचारदाता
धनगढी, २५ माघ । थारु अधिकार, न्याय ओ थारु आन्दोलनहे सफल बनाइक लाग एकवद्ध हुके लागे परना एक कार्यक्रमके सहभागि बटैले बाटैं ।
शनिच्चरके रोज धनगढीमे थारु कल्याणकारिणी सभा कैलालीके आयोजना ओ थाकस केन्द्रके समन्वयमे हुइल कार्यक्रममे थारु आन्दोलनमे रहल समस्याहे अवसरके रुपमे लेहे परना बटैलैं ।
कार्यक्रममे थाकस केन्द्रीय उपाध्यक्ष विष्णुकुमारी चौधरी थारुनके हकअधिकारके लाग संस्था एकडम सकारात्मकहुके आघे बह्रना बटैली । उहाँ सक्कु थारुनके समस्या एक्के रहल ओरसे संगठित हुके आघे बह्रेपरना बटैली ।
कार्यक्रममे थाकसके केन्द्रीय सदस्य रुकमणि थारु आपन अधिकारके लाग फुटके नाइ जुटके लागे परना बटैली । उहाँ कहली, थारु समुदायके अधिकारके लाग हम्रे एक ढिक्का हुइक परना बा ।
अस्टेके कार्यक्रममे थाकसके केन्द्रीय सदस्य किशोर विश्वास थारुहुक्रे आन्तरिक उपनिवेशमे रहल बटैटी थारुनके पहिचान ओ प्रतिनिधित्व खोजे परना बटैलैं । उहाँ कहलैं, हमार विरुद्ध भारी प्रतिगमन हुइल बा, एक टे अधिकारसे वञ्चित करैना औरेओर झुट्ठा मुद्दा लगाइल बा । यहिनसे उप्पर उठेक लाग थारु समुदाय वैचारिक, दार्शनिक रुपसे सशक्त हुइकपरना आवश्यक रहल उहाँ कहलैं ।
कार्यक्रममे थाकसके केन्द्रीय सदस्य प्रभातकुमार चौधरी थारु समुदाय दास उत्मुक्तिसे अभिनसम बाहेर आइ नैसेकल बटैलै । उहाँ कहलै, ‘दासत्व मनोबृतिसे थारु समुदाय निक्रे नैसेकटसम थारु हक अधिकार ओ न्यायके आन्दोलन आघे बह्रना कठिन बा ।’ अस्टेक कार्यक्रममे अधिवक्ता जोहरीलाल चौधरी समुदायहे आघे बह्राइक लाग सामाजिक, सांस्कृतिक, धार्मिक अवस्थाके विष्लेषण एवं पूर्वानुमान करके आघे बह्रे परना बटैलैं । उहाँ कहलैं, ‘कौनो फेन काम करेक लाग अक्केली लागके नाइहुइठ, लक्ष्य प्राप्तिके लाग सबओर फैलके एकवद्ध हुके लग्ना जरुरी बा ।’
कार्यक्रममे रामचरण चौधरी थारु समुदायके सदस्यहुक्रे राज्यमे स्थापित हुइक परना आवश्यक रहल बटैली । उहाँ थारु समुदायके आन्दोलनके लाग चेतनायुक्त दायित्वके आवश्कता रहल बठैलैं ।
कार्यक्रममे माधव थारु अपन हकअधिकार स्थापितके लाग आन्दोलन सफल पारेक परना बटैलैं । उहाँ थारु आन्दोलनके सफलताके लाग समन्वयके कमि रहल बटैलै । उहाँ सब जहनके सहकार्य ओ समन्वयमे आन्दोलन करलेसे सफल हुइना फेन कहलै । अस्टेके कार्यक्रममे समाजसेवी तथा धनगढी गाउँक भल्मन्सा सरोज चौधरी थारुन्के आन्दोलनके संघर्ष करेपरना बटैलैं ।
कार्यक्रम थारु कल्याणकारिणी सभा कैलालीके अध्यक्ष लाहुराम चौधरीके अध्यक्षतामे हुइल रहे । कार्यक्रममे टमान संघ संस्था ओ थारु नेताहुकनके सहभागिता रहल रहे ।
