आब ट बन्दकरि बन्द हडताल
कोरोना कहरसे देश मुर्झुराइल बा । कोरोना ठोठार कम हुइटि गइलमे जनता उत्साहित हुइटि रहिट । मने विगत डेढ महिनासे नेकपाके घर झगडाले देश फेन से मुर्झुरा गइलबा ।
प्रतिनिधि सभाभंग हुइलपाछे उत्पन्न राजनीतिक घटना क्रमहे मेरमेरिक पार्टीक अगुवन विश्लेसन कैके विरोध कर्टि बटाँ । पछिल्का समय विरोधके लग बन्द हडतालके सहारा ले जइटि बा । इ बिल्कुल ठिक नइहो । ओसिन टे गाडी दुर्घटनामे मुर्गि मुके सडक बन्द हुइना हमार देशमे ठन्चे बाटेम सडक अवरुद्ध हुइना बरा बाट नइहो ।
बिफेक रोज प्रचण्ड, माधव समुहसे कइगइल नेपाल बन्द कार्यक्रमके व्यापक विरोध हुइल बा । सामाजिक सन्जालमे सर्वसाढारनसे नागरिक अगुवासम बन्दके व्यापक विरोध कर्ला । बन्द फिर्ता लेहल हल्ला फेन उरल । मने बन्द फिर्ता नइ ले गइल रहे । वन्दके व्यापक असर परि गइल । हुइट हुइट सरकारके मुख्यमन्त्री फेन सडकमे बन्द करे आइल अस्वाभाविक दृष्य डेखगइल ।
बन्दसे नेपाली जनता आजित बटाँ । प्रचण्ड, माधव समुहसे कइगइल अप्किक नेपाल बन्द कार्यक्रम संवैधानिक आयोगमे नियुक्तिक बिरोधमे रहे कना समाचार आइल । संवैधानिक आयोगमे नियुक्ति असंवैधानिक बा । नियुक्ति करुइयनसे लेके नियुक्ति खउइयन फेन इ बाट मनेम जरुर खुटका लागल हुइहिन । मने यकर बिरोधके सैलि ठिक नइ रहल । बेनसे जौन जौन संवैधानिक आयोगमे नियुक्ति कइगइल रहे, उ कार्यालयमे बिरोध स्वरुप सांकेतिक रुपमे धर्ना डेना कार्यक्रम उपयुक्त हुइना रहे । उहेसे पार्टीके सिर्स नेतन आबसे बिरोधके कार्यक्रम लानेबेर बन्द कैना जइसिन खिया लागल कार्यक्रम ना लानिट ।
आजकल सडकमे सभा, जुलुसके डब्निभिराउ चलल बा । प्रतिपक्षी असंवैधानिक कदमके बिरोधमे कोण सभा कर्ना, सडकमे अइना स्वभाविक हो । मने सत्तापक्ष फेन सडकहे जो अपन बाट ढैना ठाउँ नौटंकि डेखाइटा । सुखके रोज काठमाडौंक दरवार मार्ग कब्जा कैके आमसभा कइगइल बा । कोनो दिवसके अवसरमे निकार गइल सामान्य ¥यालीके कारन टे काठमाडौंक ट्राफिक अस्तव्यस्त हुइठ कलेसे डिनभर सडक जामकइके कैजैना आमसभाले राजधानीवासीन्के पुगे पर्ना गन्तव्यहे उठलपुठल बना डेहठ । ओहेसे इ फेन एक मेरिक बन्द हस जो हो ।
विपक्षीनके बन्द कार्यक्रमके बिरोधमे जनता निक्रो कहुइया सरकार अपन बाट सुनैना नाउँमे जनतन दुख डेना कौनो टरिकासे ठिक नाइहो । काजेकि गाडीक रुटिन बिगरके विद्यार्थीनके परिच्छा छुटना, बेरामि समयमे अस्पताल पुगे नाइ सेक्ना टमान जाने मारमे परल डेखजाइठ । ओहेसे विपक्षी होए या सत्ता पक्षी आन्दोलनके नाउँमे सडकमे अवरोधनइ करक चाहि ।चाहे जौन दल जनतनके मन जिटना कार्यक्रम लानो । सदाके लग बन्द करोबन्द हडताल ।
