सुदूरपश्चिममे १४ हजार ८५५ जे लगैलै खोप
पहुरा समाचारदाता
धनगढी, २४ धनगढी । सुदूरपश्चिम प्रदेशमे पहिल चरणमे १४ हजार ८५५ जाने कोरोना भाइरस विरुद्धके खोप लगैले बटै ।
सामाजिक विकास मन्त्रालयसे डेहल जानकारी अन्सार शुकसम १३ हजार ३०१ जाने कोरोना भाइरस विरुद्धके खोप लगैले रहिट । कलेसे शनिच्चरके रोज ठप १५ सय ५४ जाने खोप लगाइल सामाजिक विकास मन्त्रालय सुदूरपश्चिम प्रदेशके प्रवक्ता नरेन्द्र सिंह कार्की जनैलै ।
प्रवक्ता कार्कीके अन्सार कैलालीमे सेती प्रादेशिक अस्पताल ओ टीकापुर अस्पतालमे करके ४१ सय ८४, कञ्चनपुरके महाकाली अस्पतालमे २७ सय ९२, डोटीके जिल्ला अस्पतालमे ११ सय ३७, दार्चुलाके जिल्ला अस्पताल ओ गोकुलेश्वरमे एक हजार ८२, डडेल्धुराके डडेल्धुरा अस्पतालमे एक हजार ६२, बाजुराके जिल्ला अस्पतालमे ६ सय १५, बझाङके जिल्ला अस्पतालमे एक हजार ९१, बैतडीके जिल्ला अस्पताल ओ कोभिड अस्पतालमे १३ सय ९७, अछामके जिल्ला अस्पतालमे १४ सय ९५ जाने कोरोना भाइरस विरुद्धके खोप लगैले बटै ।
सरकार पेसाके आधारमे खोप लगैना प्राथमिकता निर्धारण करले बा । दैनिक सेवा प्रवाह करेबेर सर्वसाधारणके भीडभाडमे रहिके काम कैना समूहहे खोप डेहे पर्ना प्राथमिकतामे समावेश करल होरु। पहिल चरणके खोप लगैना समय शनिच्चर ओराइल बेर पेसाके आधारमे जोखिम क्षेत्रमे काम करुइयाके पहिचान करल बा । यैसिक पहिचान करल समूहमे निजी क्षेत्रमे कार्यरत कर्मचारीफे बटै ।
स्वास्थ्य तथा जनसंख्या मन्त्रालयसे पहिल चरणमे ४ लाख ३० हजारसे खोप लगैना घोषणा करलेसेफे शुकके साँझ ४ बजेसम १ लाख ७१ हजार ४ सय ८६ जाने केल खोप लगैले रहिट । पहिल चरणमे स्वास्थ्यकर्मी, त्रिभुवन विमानस्थलमे कार्यरत कर्मचारी, महिला स्वयंसेविका, एम्बुलेन्स चालक, शव वाहन चालक, वृद्धाश्रममे बैठना ओ ओइनके स्याहारमे खटना कर्मचारीहे खोप लगाइल होरु । ओस्टेक, जेलके कैदी ओ ओइनके सुरक्षामे खटल सुरक्षाकर्मीसेफे खोप लगासेकल बटै ।
दुसरा चरणमे अग्रपंक्तिमा खटना प्रहरी, सेना, सशस्त्र प्रहरी, नगरपालिकासे नियुक्ति करल नगर प्रहरी, यातायातकर्मी (चालक ओ सहचालक), हवाई यातायातमे कार्यरत क्याबिन क्रु, एयरपोर्टमे कार्यरत कर्मचारी, बैंक, मालपोत, नापी, खानेपानी, विद्युत ओ सञ्चारमे कार्यरत कर्मचारीहे खोप लगैना सूची सरकारसे तयार करल होरु। यातायातकर्मी कहलेसेफे सार्वजनिक यातायातके साधन चलैना कहिके किटान भर करल नइहो ।
‘सामाजिक दूरी कायम कैना प्रयास करेलेसेफे सम्भव नइहुइना प्रायःजैसिन कार्यालयके कर्मचारीहे खोप लगैना सूची बना सेकल बटी,’ स्वास्थ्य मन्त्रालयके एक उच्च तहके कर्मचारी कहलै, ‘मने निर्णय भर हुईना बाँकी बा ।’ स्वास्थ्य सेवा विभागसे यैसिन कार्यालयमे कटरा कर्मचारी कार्यरत बटै कना यकिन तथ्यांक संकलन करल बा । दुसरा चरणके खोप लगैना प्राथमिकताके सूचीमे ५५ वर्ष उमेर समूहसे उप्परके नागरिकहेफे धारल बा ।
ओस्टेक ४० से ५४ वर्ष उमेर समूहके दीर्घरोगी, वैदेशिक रोजगारसे नेपाल लौटल ओ नेपालमे रहल शरणार्थीमध्ये दीर्घरोग रहलहे खोप लगैना प्राथमिकतामे धारल बा । ओइनसेफे उच्च प्राथमिकतामे ७५ वर्ष उमेर समूहसे उप्परके समूहहे धारल बा । ७५ वर्ष उमेर समूहउप्परके जनसंख्या ५ लाख ९९ हजार २ सय १४ जाने रहल मन्त्रालयके आकलन बा । ७० वर्षसे उप्पर उमेर समूहमे ११ लाख १३ हजार २ सय ३२ जाने रहल अनुमान करल बा ।
‘अब खोप लगाईबेर पेसा व्यवसाय वा उमेर समूहमध्ये कुहीहे पहिल प्राथमिकता डेना कना निर्णय हइल नइहो,’ स्वास्थ्य सेवा विभागके उच्च तहके एक कर्मचारी कहलै, ‘खोप कार्यक्रम चल्टी रहल ओरसे शनिच्चरसम यी निर्णय हुसेकठ ।’ भारत सरकारसे अनुदानस्वरूप उपलब्ध कराइल १० लाख डोजमे कम्तीमे ४ लाख डोज बचत हुइना मन्त्रालय आकलन करले बा ।
भारतके एक कम्पनीसंग २० लाख डोज भ्याक्सिन खरिद कैना प्रक्रियासमेत अन्तिम चरणमे पुगल स्वास्थ्य सेवा विभाग जनैले बा । खरिद कैना मूल्य टुंगिन केल बाँकी रहल विभाग स्रोत बटाइल । कोभाक्स सुविधासे पहिल चरणमे २२ लाख खोप अइनाफे निश्चित हुसेकल मन्त्रालय जनैले बा । चीन सरकारसे अनुदानमे तीन लाख डोज उपलब्ध करैना घोषणा करसेकल बा । दुसरा चरणमे खोप अइना निश्चित हुइलेसेफे पेसाके आधारमे खोप लगैना समूहके पहिचानहे तीव्रता डेहल स्वास्थ्य मन्त्रालय स्रोत जनैले बा ।
देशभर १९५९ जाने सक्रिय संक्रमित
काठमाडौं, २४ माघ । बिटल २४ घण्टामे देशभर ९९ जाने संक्रमित ठपल बटै । यी संगे देशभर कोरोनाके सक्रिय संक्रमित १९५९ जाने रहल बटै ।
यिहेबीच देशभर कोरोना संक्रमितके कुल संख्या २ लाख ७१ हजार ८०६ जाने पुगल बा । कलेसे ठिक हुइल संख्या २ लाख ६७ हजार ८१२ पुगल बा । ओस्टेक मृतकके संख्या २०३५ पुगल बा ।
हालसम कोरोना ठिक हुइल प्रतिशत ९८.५ प्रतिशत रहल बा । पछिल्का २४ घण्टामे २७९४ जानेक कोरोना परीक्षण हुइल बा । कलेसे हालसम कुल परीक्षण संख्या २० लाख ९१ हजार १६६ पुगल स्वास्थ्य तथा जनसंख्या मन्त्रालय जनैले बा ।
