अनेमसंघसे प्रधानमन्त्रीहे ज्ञापनपत्र

पहुरा समाचारदाता
धनगढी, २५ माघ । अखिल नेपाल महिला संघ (अनेम) कैलाली प्रधानमन्त्री केपी शर्मा ओलीसे नेपालके संविधानके धाराहे ठारे उलंघन कैके असंवैधानिक, अलोकतान्त्रिक ओ स्वायाच्छाचारि ढंगसे प्रतिनिधि सभा विघटन कैके प्रतिगमन कदम चालल् ठहर कैटी घोर आपत्ति जनैले बा ।

प्रधानमन्त्रीके उ कदमसे देशमे अस्थिरता आके देश बरवार दुर्घटनामे गैल ओरसे प्रतिनिधि सभा तत्काल सुचारु करे पर्र्ना माग राख्टी संघसे प्रधानमन्त्री ओलीहे ज्ञापनपत्र समेत बुझैले बा । अखिल नेपाल महिला संघके गीता सोडारी ओ सरु थारुके नेतृत्वमे गैल टोलीसे प्रमुख जिल्ला अधिकारी यज्ञराज बोहरामार्फत ज्ञापनपत्र बुझाइल हो ।

इहे बिच संघसे बैतडी दोगडाकेदार गाउँपालिका–७, चडेपानीके १७ वर्षिया किशोरी भागरथी भट्टके बलात्कार पाछे हत्या हुइल घट्नाके निश्पक्ष रुपमे छानविन कैके दोषीहे कार्यवाही करे पर्ना माग करले बा ।

संघसे अँट्वारके एक प्रेस विज्ञप्ति निकर्टी उ माग करल हो । बैतडीमे बलात्कार पाछे हत्या हुइल घट्नामे गम्भीर रुपमे ध्यानकर्षण हुइल बटैटी घट्नाके तुरुन्त छानबिन कैके सत्य तथ्य बाहर लानके दोषीहे कडा कारवाही कैना माग करल हो ।