भागरथीके न्यायके लाग जोडदार माग
पहुरा समाचारदाता
धनगढी, २६ माघ । बैतडीके १७ वर्षिया किशोरी भागरथी भट्टहे न्याय डेहुवाइ पर्ना सुदूरपश्चिमके सांसद प्रदेश सभामे जोडदार माग करले बाटै ।
सोम्मारके बैठल सातौं अधिवेशनके पहिल बैठकमे बोलुइया सासंदहुक्रे भागरथीके घटना निर्मला पन्तके जस्टे टे नैहुइ कहटी अशंका फेन करले बाटै । बोलुइया अधिकांश सांसदहुक्रे भट्टके न्यायके लाग प्रदेश सरकारहे गम्भीर ध्यानाकार्षण कराइल रहिट ।
सांसद लिलाधर भट्ट पाँच दिन बित्लेसे फेन भागरथीके हत्यारा ओ बलात्कारी पता लागे नैसेक्ना कहटी थप अनुसन्धान ओर ध्यान डेहे पर्ना आग्रह करल रहिट । उहाँ इ अवस्थामे प्रदेश सरकारके मन्त्रीहुक्रे ओहकान न्यायके लाग लडे पर्ना फेन औँल्याइल रहिट ।
विशेष समयमे बोल्टी प्रतिपक्ष दल कांग्रेसके ससंदीय दलके नेता रणबहादुर रावल भागरथी भट्टके जस्टे घटना प्रदेशमे दोहरे नैडेहक लाग प्रहरी ऐन लाने पर्ना बटैलै ।
‘जनताके जिउ धनके सुरक्षा, शान्तिके प्रत्याभूति डेहुवाइ प्रदेश सरकार नैसेकल ओरसे किशोरीउपर इ मेरके घटना हुइटी रहल बा,’ उहाँ कहलै ।
राष्ट्रिय समाजवादी पार्टीके सांसद कृष्णबहादुर चौधरीहे फेन भागरथीके अपराधीहे न्याय डेहुवाइक लाग तीनु तहके सरकार लागे पर्ना बटैलै ।
‘अपराधीहे हालीसे हाली पत्ता लगाइ परल । निर्मलाके केससे सारा जनता रोइल बाटै । भागरथीके केसमे कौनो ढिला नहोए,’ सांसद चौधरी कहलै ।
भूमि व्यवस्था कृषि तथा सहकारी मन्त्री विनिता चौधरी घटनाके सत्यतथ्यके लाग सम्बन्धित निकाय ध्यान पुगाइ पर्ना माग करली ।
मन्त्री चौधरी सुदूरपश्चिम प्रदेशके बिउ बिजन सम्बन्धी व्यवस्था कैना बनल विधेयक, पशुसेवा स्वास्थ्यसम्बन्धी व्यवस्था बनल विधेयक ओ प्रदेशके दुग्ध विकास बोर्ड स्थापना ओ व्यवस्था कैना सम्बन्धमे व्यवस्थाके लाग बनल विधेयक सभा समक्ष टेबुल करल रही ।
सभाके औरे बैठक फागुन ६ गते बिफेक रोज दिनके १ बजे बोलाइल बा ।
आभिन हत्यारा पत्ता नैलग्लै
प्रहरी घटनाहे गम्भीररुपमे लेहल बटैलेसे फेन घटना हुइल अँठ्वार दिनसम फेन हत्यारा पत्ता लगाइ सेकल नैहो । घटनाके सुक्ष्म अध्ययन ओ अनुसन्धान हुइटी रहल बैतडीके प्रहरी प्रमुख प्रहरी नायब उपरीक्षक नारायणप्रसाद अधिकारी जानकारी डेलै । अनुसन्धान ओ अध्ययनके लाग हमार उप्परके निकाय फेन परिचालन हुइल बा उहाँ कहलै, ‘दोषीहे पत्ता लगाइक लाग हमार सक्कु शक्ति लागल बा, हाली पत्ता लगाब ।’
सुदूरपश्चिम प्रदेश प्रहरी कार्यालयके प्रमुख प्रहरी नायब महानिरीक्षक उत्तमराज सुवेदीके टोली फेन घटनास्थलमे पुगके अध्ययन करटी रहल बा । इहीसे आघे सुदूरपश्चिम प्रदेश प्रहरी कार्यालयके वरिष्ठ उपरीक्षक जनकराज पाण्डे नेतृत्वके अनुसन्धान टोली, केन्द्रीय अनुसन्धान ब्युरोके वरिष्ठ प्रहरी उपरीक्षक पञ्चकुमार बाँखुसहित प्राविधिक टिम परिचालन हुइल बा ।
प्रहरीसे भागरथीके नाटपाटनसे पुँछपाँछ कैनाके साथे शंकास्पद व्यक्तिउपर निगरानी बह्राके सुक्ष्म अध्ययन करटी रहल जिल्ला प्रहरी कार्यालय जनैले बा । यकर साथे तालिम प्राप्त कुक्कुर भागरथीके हत्या हुइल बनुवा क्षेत्र फेन प्रहरी ‘सर्च’ करल रहे । इहे क्रममे किशोरीसे प्रयोग करटी रहल मोबाइल फेन घटनास्थलमे प्राप्त हुइल मोबाइलबसे ढिउर चीज पत्ता लग्ना प्रहरीके दाबी रहल बा ।
किशोरीके आफन्त तथा स्थानीय बासिन्दासे संघर्ष समिति नै गठन कैके आन्दोलन करटी रहल बाटै । अँट्वारसे तीन दिनके लाग शैक्षिक हड्ताल करल संघर्ष समितिके सदस्य भुवन कार्की जानकारी डेलै ।
संघर्ष समितिसे पहिल चरणमे तीन दिन शैक्षिक हड्ताल कैना, माघ २८ गते दोगडाकेदार गाउँपालिका घेराउ कैना ओ माघ २९ गते आम हड्ताल कैना घोषणा करल बा । इहीसे आघे शुकके ओ शनिच्चरके फेन आफन्त ओ स्थानीय बासिन्दा महाकाली राजमार्गमे चक्काजाम कैनाके साथे प्रदर्शन करल रहिट । भागरथी न्याय पाइ पर्ना ओ दोषीहे पत्ता लगैना मागसहित जिल्लास्थित राजनीतिक दल फेन एक ठाउँमे हुइल बाटै । जिल्लाके टमान स्थानमे प्रदर्शन हुइटी रहल बा । जिल्ला प्रशासन कार्यालय आघे ¥यालीसहित दोषीहे यथाशीघ्र पक्राउके माग कैटी नाराबाजीसमेत करल बा ।
भागरथीके स्वाब परीक्षणके लाग काठमाडौं पठागैल
दोगडकादार गाउँपालिका– ७ चडेपानीके १७ वर्षिया किशोरी भागरथी भट्टके ‘भेजाइनल स्वाब’ काठमाडौँ पठाइल बा । बलात्कारपाछे हत्या करल आशंका करल ओहककान स्वाब परीक्षणके लाग राष्ट्रिय विधि विज्ञान प्रयोगशालामे पठाइल हो ।
घटनाके प्रकृति हेरेबर बलात्कारपाछे हत्या हुइल आशंका करल ओरसे स्वाब परीक्षणके लाग पठाइल प्रहरी जनैले बा । स्वाब परीक्षणसे थप अनुसन्धानके लाग सहज हुइना प्रहरी प्रवक्ता जनक धाँमी जानकारी डेलै ।
उहाँ कहलै, घटनास्थलसे प्राप्त हुइल सक्कु प्रमाण सुरक्षित राखके थप अनुसन्धानके काम हुइटी रहल बा । डिएनए परीक्षणके लाग ‘भेजाइनल स्वाब’लगायतके नमूना संकलन करल हो । भागरथीके ‘भेजाइनल स्वाब’मे शंका लागल व्यक्तिके शुक्रकिटसे मिलल्मे दोषी ठहर हुइना प्रहरी बटैले बा ।
स्वाब एक सहायक सामग्री रहल ओरसे बलात्कार करुइया व्यक्तिके डिएनए छुटल रलेसे किल परीक्षणसे पता चल्ना जिल्ला अस्पताल बैतडीके प्रमुख डा. वसन्तराज जोशी बटैलै । उहाँ कहलै, स्वाब परीक्षण रिपोर्टसे कैसिक मृत्यु हुइल कना चीजके प्रमाणित करठ् । शवके परीक्षण कार्य जिल्ला अस्पतालमे शनिच्चरके करल रलेसे फेन आभिन सार्वजनिक करल नैहो । शव परीक्षण करल रलेसे फेन रिपोर्ट तयार कैना काम अन्तिम चरणमे पुगल उहाँके कहाइ बा । उहाँ कहलै, रिपोर्ट तयार कैना काम अन्तिम चरणमे बा, आज प्रहरीहे बुझाब ।
शव परीक्षण रिपोर्ट आइलपाछे किल ढिउर चीज पता हुइना जिल्ला प्रहरी कार्यालय जनैले बा । शव परीक्षण हुइल तीन दिनसम फेन आफन्तहुक्रे शव बुझे नैमानल हुइट । बलात्कारपाछे हत्या हुइल ओ हत्यारा पत्ता नै लागटसम शव नै बुझ्ना भागरथीके काका शिवराज भट्ट बटैलै ।
उहाँ कहलै, वास्तविक हत्यारा पत्ता नै लागटसम शव बुझना बाटे नैहो, माघ २१ गते विद्यालय गैल भागरथी साँझसम फेन घर नै आइलपाछे खोजतलास करटी जाइबर माघ २२ गते घर लग्गेक लबलेक बनुवामे विभत्स ओ निर्वस्त्ररुपमे मृत अवस्थामे फेला परल रही । भागरथी दोगडाकेदार गाउँपालिका–३ श्रीकोटस्थित सनातन धर्म माविमे अध्ययनरत रहल रही ।
भागरथीके न्यायके लाग कञ्चनपुरमे ¥याली
कञ्चनपुर, २६ माघ । बैतडीके दोगडाकेदार गाउँपालिका–७ चडेपानीके १७ वर्षिया भागरथी भट्टके न्यायके लाग सोम्माकरे कञ्चनपुरमे विद्यार्थी ¥याली निकरले बाटै ।
जिल्लाके टमान स्थानमे विद्यार्थी तथा स्थानीय पीडितपक्षहे न्याय डेहुवाइना उद्देश्यसे शान्तिपूर्ण ¥याली प्रदर्शन करल हुइट । प्रदर्शनके क्रममे उहाँहुक्रे बलात्कारपाछे भागरथीके निर्मम हत्या हुइल कहटी तत्काल घटनाके छानविन कैके दोषीहे पक्राउ कैना माग करले बाटै ।
विद्यार्थी, युवा, अधिकारकर्मी लगायतहुक्रे न्यायके लाग प्रशासन आघे नाराबाजी करल रहिट ।
घटनाके दोषी पक्राउ नैपरटसम आपन प्रदर्शनके कार्यक्रम निरन्तर जारी राख्न प्रदर्शनमे सहभागी युथ भ्वाइस कञ्चनपुरके सदस्य भोजराज भट्ट बटैलै ।
नेतृ राणासे भागरथीके हत्याराहे कारवाही करना माग
नेपाली काँग्रेसके नेतृ एंव संविधानसभा सदस्य डा. आरजु राणा देउवा बैतडीके दोगडाकेदार गाउँपालिका–७, चडेपानीके भागरथी भट्टके हत्याके घटना प्रति गम्भीर ध्यानाकर्षण हुइल जनैले बाटी ।
उ घटनासे अपनहे अत्यन्ते दुःखीत ओ स्तब्ध बनाइल कटी नेतृ राणा घटनाके सत्यतथ्य पत्ता लगाके दोषीहे कडा कारबाहीके माग करले बाटी ।
नेपाली काँग्रेसके नेतृ एंव वरिष्ठ महिला अधिकारकर्मी राणा अपन सामाजिक संजाल फेसुबक पेज मार्फत बैतडीके दोगडाकेदार गाउँपालिकाके १७ वर्षिया किशोरी भागरथी भट्टके बलात्कार पाछेक हत्याके आशंका एक जघन्य अपराध हुइल ओ उ निस्पक्ष छानबिन करके दोषीहे अविलम्ब पक्राउ करके कारबाहीके लाग सरकारसंग जोडदार माग करल हुइटी ।
नेतृ राणा मृतक किशोरी भागरथी प्रति श्रद्धान्जली ओ शोकसन्तप्त परिवारजनमे समवेदना व्यक्त करले बाटी ।
