भागरथीके हत्यारा ना उम्के
गइल बुढके बैतडीके भागरथी भट्टके हत्या प्रकरन कन्चनपुरके निर्मला घटनाहे फेनसे हरेर कैडेले बा । बैतडी दोगडाकेदार–३ स्थित सनातन धर्म मावि खोचलेकमे कक्षा १२ मे पढ्ना उहाँ उ रोज स्कुलसे घरे नैघुम्ली । खोजेबेर औरेरोज बनुवामे बीभत्स अवस्थामे उहाँक् लाश मिलल् । उहाँक् बलात्कारपाछे हत्या हुइल आशंका नाटपाट ओ गँवल्यन करले बटै । नेपाली काँग्रेसके सभापति शेरबहादुर देउवा फेन भागरथी भट्टके हत्या घटनाके तत्काल अनुसन्धान करके दोषीउप्पर कारबाहीके माग करले बटै ।
पोस्टमार्टम रिपोर्ट अइना बाँकी बा । ओहेसे परिवार उहाँक लाश नैबुझले हो । भट्ट पह्रना स्कुलके विद्यार्थी ओ स्थानीये दोषी पक्राउके माग करटी लग्ढार प्रदर्शन फे कर्टि बटै । ओइसिन टे घटनामे शंकास्पद कुछ व्यक्तिन नियन्त्रणमे ले गइल बा । एसएसपीके नेतृत्वमे केन्द्रीय अनुसन्धान ब्युरो सीआईबीके अधिकारीसमेत सम्मिलित प्रहरी टोली घटनास्थलमे पुगके अनुसन्धानहे तिव्र बनैले बा । घटनास्थलमे मोबाइल फेन मिलल् ओर्से हत्यारा हालि मिल्ना प्रहरीके कहाइ बा ।
निर्मला हत्या घटनामे फेन प्रहरी अपराधी हालि मिलि कहे । मने उ घटना ओस्टे फासफुस हुइना अवस्थामे पुगल बा । भर्खरे प्रधानमन्त्री केपी ओली धनगढीके आमसभामे सम्बोधन करे आइबेर इ घटनाबारे कुछ नै बोल्लाँ । उल्टे उ रोज निर्मला हत्या घटनामे संग्लग्नहे कार्वाही होए कना टिसर्ट लगाके दवाव डेहुइया युवन पकर जा गइल रहे ।
कन्चनपुरके निर्मला हत्या घटनामे बदनाम प्रहरी प्रशासन भागरथी भट्टके हत्या प्रकरनमे बदनाम ना होए कना सबओर्से दवाव बा । यदि उपरसे बरा नेटनके दवाव नैआइट कलेसे निर्मलाके हत्याराके मुखौटा फेन खुल्ने रहे । भागरथी भट्टके हत्याराहे छुटैना केक्रो खेल ना होए । यकर लग उहाँक् पह्रना सूकलके विद्यार्थी ओ स्थानीय गँवल्यनसे किल फेन आमनागरिक सबजे घटनाके विरुद्धमे आवाज उठाइक चाहि ।
घटना हुइल डिन भागरथी भट्ट सुनसान बनुवक डगर अकेलि स्कुलसे आइटहि । ओहेसे अपराधी मौका पाइल । डिडिबाबुनके कम्टिमे सुनसान लम्मा डगर बा कलेसे संघरेनके साथमे रहक चाहि कना सिख्खा फे डेले बा इ घटना । अपराधी चाहे जट्रा उँचा पद रहल परिवारके होए, भागरथीके हत्यारा ना उम्के ।
