प्लस टु के विद्यार्थी ओ भविष्यके डगर

राष्ट्रिय परीक्षा बोर्ड, परीक्षा नियन्त्रण कार्यालय गइल अठवार कक्षा १२ के रजेल्ट सार्वजनिक करले बा । कोरोनाके कारन बोर्डसे निर्धारित वार्षिक तालिकासे ढिला करके अगहनमे ओ संक्रमित परीक्षार्थीनके पुस महिनामे परीक्षा हुइल रहे । परीक्षामे नियमितओर ३ लाख १० हजार ३१६ जाने ओ ग्रेडवृद्धिओर ९१ हजार ९ सय, ओस्टक आंशिकओर ३१ हजार ५५ कैके जम्मा ४ लाख ३३ हजार २७१ जाने सहभागी हुइल रहिट ।

प्लस टु परीक्षामे करिब साढे चार लाख विद्यार्थीनके संख्या कम नै हो । एसइइके पाछे प्लस टु कोर्समे विज्ञान पह्रना कि मानविकी या कमर्स ? विद्यार्थीनके हिच्किचाहट रहल डेख्जाइठ । विज्ञान विसय लेहुइयन ओकर पाछे का मुख्य विसय लेके पह्रना विद्यार्थीनके फे डोस्रे हिच्किचाहट रहल डेख्जाइठ । कोइ डाइ बाबब्के डवावमे विज्ञान पह्रल कहटि कर्रा लागके बिचेम पह्राए जो ढिला डेठाँ ।

छाइछावा मजा विसय लेके पह्रिट, मजा नम्बर लानिट कना अस्रा सबकोइ डाइ बाबन्के रहना स्वभाविक हो । मने आपन लर्कापर्कनके इच्छा विपरिट ओइन डबाब नै डेहक चाहि । अपन लर्कापर्का अपने गोरम ठह्रियाइट कना सबकोइ अभिभावकके सपना रहठ । पह्रलिखके घरे ओस्टे रहलेसे घरछिमेकके किल नाइ कि घरहिक मनै फे हिवाइ लग्ठाँ । मने लर्कापर्का अपने गोरम ठह्रियाइक लग उचित रायसल्लाह डाइबाबनके नै पुगल बिल्गाइठ ।

मेरमेरिक सेवा ओ पदके लग आवस्यक कर्मचारि छनौट करक लग लोकसेवा आयोग निस्पच्छ रुपमे लिखिट परिच्छा, अन्टर्वार्टा, प्रयोगाट्मक परिच्छा चलाइठ । परिच्छा संचालन, नटिजा प्रकासन, अन्टर्वार्टा संचालन आडि कामेम लोकसेवा आयोग आपन निस्पच्छटा डेखइटि आइल बा । मने लेउ भइयो, लोकसेवा टयारि करो कहिके बहुट कम अभिभावक लर्कापर्कन हौसल डेठाँ ।

जबकि हाकिमके चाकडि कैना, कर्मचारिनके किल प्रगटि हुइना नाटाबाड, कृपाबाडहे आयोग नियन्ट्रन कैले बा । लोकसेवा आयोगके निस्पच्छ रुपमे परिच्छा संचालन कैडेलक ओरसे आपन मेहनट ओ लगनसे सहसचिवसम आपन छेमटाले पुगे सेक्ना अवस्ठा बा । ओहेसे प्लस टु पाछे मै का बनम कना युवावर्ग सोंच बनाइक ढिलाइ नै करक चाहि । डाइ बाबनके बोझ बन्नासे अपन पह्राइ खर्चक लग काम कर्टि पह्रना जुगार अपनेहे करे सेकक् चाहि ।