बलात्कार ओ हत्यामे संलग्न व्यक्तिहे हाली पक्राउ करना
बैतडी, २७ माघ । बलात्कारपाछे हत्या करल बैतडी दोगडाकेदार गाउँपालिका–७, चडेपानीके १७ वर्षिया किशोरी भागरथी भट्टके हत्यामे संलग्न व्यक्ति हाली कानुनी दायरामे अइना प्रहरी जनैले बा ।
प्रहरी भट्टके बलात्कार तथा हत्याके अनुसन्धानके दायरा साकिर हुइटी गैल ओ हाली हत्यामे संलग्न व्यक्ति पक्राउ पर्ना जनाइल हो । सुदूरपश्चिम प्रदेश प्रहरी प्रमुख प्रहरी नायव महानिरीक्षक (डिआईजी) उत्तम सुवेदी अनुसन्धानके दायरा साँकिर हुइटी गैल ओ अपराधमे संलग्न व्यक्तिहुक्रे हाली नियन्त्रणमे अइना बटैलै ।
सनातन माध्यामिक विद्यालयमे कक्षा १२ मा अध्ययनरत बैतडी दोगडाकेदार गाउँपालिका–७, चडेपानीके १७ वर्षिया किशोरी भागरथी भट्टके बुधके बलात्कारपाछे हत्या हुइल रहे । ओहकान शव एकदिनपाछे विद्यालय ओ घरक मध्यभागके बनुवामे फेला परल रहे ।
दोषीहे कारबाहीके माग कैटी मुख्यमन्त्रीहे ज्ञापनपत्र
बैतडीके भागरथी भट्टके हत्या प्रकरणके दोषीहे कारबाहीके माग कैटी सुदूरपश्चिम प्रदेशके मुख्यमन्त्री त्रिलोचन भट्टहे ज्ञापनपत्र बुझाइल बा ।
मंगरके महिला मानवअधिकार कर्मीहुक्रे भागरथीके घटनाप्रति मुख्यमन्त्री भट्टके ध्यानाकर्षण करैटी दोषीहे कारबाहीके माग कैटी ज्ञापन पत्र बुझाइल हुइट । ज्ञापनपत्र बुझ्टी मुख्यमन्त्री भट्टसे बैतडीमे घटल पाछेक घटनामे प्रदेश सरकार गम्भीर रहल बटैलै ।
प्रदेश अन्तरगतके जिल्ला प्रशासन ओ सुरक्षा निकाय प्रदेश सरकार मातहत नैआइल ओरसे शान्ति सुरक्षा सम्बन्धि कार्य सम्पादनमे कुछ समस्या रलेसे फेन प्रदेश सरकार सक्कु जनहनसे समन्वयमे अपराध नियन्त्रणमे लागल बटैलै । पीडित परिवारहे का कैसिन राहत डेना फेन छलफल कैके निर्णय कैना उहाँ प्रतिबद्धता जनैलै ।
