भेट्रान फुटबलमे कैलारी स्मार्ट युवा क्लब विजयी

पहुरा समाचादाता
हसुलिया, २९ माघ । कैलालीके कैलारी गाउँपालिका–३ उत्तर भडरीमे जारी अध्यक्ष रनिङ कप खेलकुद प्रतियोगिता अन्र्तगत बुधके भेट्रान फुटबल प्रतियोगिता सम्पन्न हुइल बा ।

आयोजक कैलारी स्मार्ट समन्वय युवा क्लब कैलाली ओ धनगढी उपमहानगरपालिका वडा नं. १२ जुगेडाके मनकामना युवा क्लब बिच हुइल प्रतियोगितामे आयोजक कैलारी स्मार्ट युवा क्लब १ के विरुद्ध ६ गोल कैटी विजयी हुइल बा ।

आयोजक क्लबके ओरसे टीम क्याप्टेन भीखराम चौधरी २ गोल, जीवन चौधरी २ ओ गुलाब चन्द चौधरी २ गोल करल रहिट । कलेसे मनकामना युवा क्लबके सुरज खाती १ गोल करल रहिट ।

प्रतियोगितामे प्रथम हुइल टीमहे नगद ६० हजार सहित ट्रफि, मेडल ओ प्रमाण पत्र ओ द्वितिय हुइल टीमहे नगद रु ३० हजार सहित ट्रफि, मेडल ओ प्रमाण पत्र प्रदान करल मिडिया संयोजक मिशन चौधरी जानकारी डेलै ।