मिस थारु डेखावा कि प्रतिभाके विकास ?

कुछ बरस यहोर मिस नेपालमे बठिन्यनके आकर्षण बह्रे हस मेरमेरिक जाति केन्द्रित सौन्दर्य प्रतियोगिता हुइना क्रम बह्रल बा । इहे क्रममे मिस्टर एन्ड मिस थारुके टिसरा संस्करनके अडिसन थरुहटके जिल्लामे हुइटि बा । वाइएसी इभेन्ट्सके सहकार्यमे जह इन्टरटेनमेन्टसे आयोजित इ प्रतियोगिताके पहिल चरण बुढके धनगढी, सुनसरी, सिरहा, वीरगञ्ज लगायट ठाउँमे अडिसन हुइल बा । पहिल चरणके कार्यक्रम आउर ठाउँमे अभिन हुइना बाँकि बा ।

पहिल चरणके अडिसनपाछे छनौट हुइल प्रतिस्पर्धीनहे काठमाडौंमे २५ दिनसम टमान विधामे प्रशिक्षण डेजैना आयोजक पक्ष जनैले बा । प्रतियोगिताके ग्रान्ड फिनाले चितवनके सौराहामे चैत्र ७ गते हुइना बा ।

मिस नेपालमे जिटल प्रतिभा आकर्षक पुरस्कार, गाडी लगायट सुविधा पैठाँ । विश्व सुन्दरीके दौडमे सहभागिटा जनैना अवसर पैठाँ । भारतसे विश्व सुन्दरी विजेता बन सेकलमे नेपालसे अभिन सम कोइ विश्व सुन्दरीके ताज नै पहिरले हो । मने मिस नेपालके ताज पहिरुइयनहे अवसरके टमान डवार खुल्ठिन । ओइने मेरमेरिक ब्रान्डके एम्बेसडर बन्नासे लेके विज्ञापन खेल्के मजा कमाहि कर्ठा । सलिमा खेल्ना टे सामान्य बाट हुइन् ।

मने मिस्टर एन्ड मिस थारु प्रतियोगिता जिटल प्रतिभा गुमनाम बटाँ । सन् २०१७ से इ प्रतियोगिता सुरु रहे । पहिला संस्करणके मिस्टर थारु २०१७ चन्दन चौधरी रहिट कलेसे मिस थारु २०१७ जेनिशा चौधरी हुइल रही । ओस्टके २०१८ के मिस्टर थारु रविन चौधरी ओ मिस थारु आकृति चौधरी हुइल रही । बिचमे इ प्रतियोगिता हेरा गइल । पहिले प्रतियोगिता जिटल प्रतिभा चन्दन, जेनिशा, रविन, आकृति का अवसर पइला ? थारु समाजके लग का योगदान कर्ला ? प्रतियोगिता पाछे यदि ओइन ठन डेखाइ लाइक कुछ प्रतिभा नै हुइन कलेसे मिस्टर एन्ड मिस थारु प्रतियोगिता डेखावा कि प्रतिभाके विकास ? कना सवाल खडा हुइठ ।

मिस्टर एन्ड मिस थारु प्रतियोगिता जिटुइयन नगद ५० हजार, फस्ट रनरअप ३० हजार, सेकेण्ड रनरअप २० हजार ओ टमान उपहार डेना जना गइल बा । मने समय अनुसार इ रकम फेन बहुट कम हो । इ प्रतियोगिता उपलब्धिमुलक बने । कुछ मनैन्के लग हाहाहिहि कैना ठाउँ ना बने । प्रतियोगिता जिटुइया ठँरिया बठिन्यन थारु समाजके ‘आइडल’ बनिट । प्रतियोगिता जिट्लक डु चार डिनिम गुमनाम ना हुइट ।