‘अपन लाग लरना अन्तिम समय हो’
रामअवतार चौधरी
कपिलवस्तु, २९ माघ । कपिलवस्तुके बुद्धभुमि नगरपालिका–२, गोरुसिंगेमे हुइल एक कार्यक्रममे थारु अगुवाहुक्रे औरके लाग सयौं चो लरसेकल ओरसे आब अन्तिम चो अपन लाग लरे पर्ना समय आइल बटैले बा ।
थारु कल्याणकारी सभा, थरुहट/थारुवान संयुक्त संघर्ष समिति जिल्ला संयोजन समिति कपिलवस्तुके आयोजनामे हुइल एक कार्यक्रममे अगुवाहुक्रे ओसिन बटाइल हुइट ।
थाकसके केन्द्रीय उपाध्यक्ष विष्णुकमारी चौधरी कार्यक्रमहे सम्बोधन करटी अपनेहुक्रे कौनो जातजातीके हक अधिकार हन्न नइहुके करके थारु समुदायके माग मुद्दा सम्बोधन हुई पर्नामे जोड डेली । थारुनहे गुमराहमे पारके गैरथारु समुदायके व्यक्तिसे मौकाके फाइदा उठाइल उहाँ आरोप लगैली ।
थारु आयोग लगायत ओइनके नाउँमे निर्वाचनमे भोट तथा व्यक्तिहे दुव्र्र्यवहार करल समेत उपाध्यक्ष चौधरी बटैली । थारु समुदायके माननीय रेशम चौधरी, लक्ष्मण थारु लगायत थारु अगुवाहुकनहे कैदी बनाके जेल जीवन विटैटी रहल थारुनहे रिहाइके माग करटी अस्तित्व बचैना सर्वसाधारणहे चौधरी आग्रह करली । अन्तरक्रिया कार्यक्रमके व्यानरमे लिखल ‘ज’ के अर्थ जनचेतना, जनजागरण ओ जनपरिचालन रहल प्रष्ट परटी थारु समुदायके हितके लाग समुदायहे सचेत पर्नाके विकल्प नइरहल उपाध्यक्ष चौधरी बटैली ।
थाकस केन्द्रीय सदस्य रूकमणी थारु कार्यक्रममे बोल्टी थारु समुदाय हिन्दु नइहुके बौद्धिस्ट रहल जनैटी रणनीति अप्नैना जरुरी रहल बटैली । उहाँ थारु समुदायके हक, हित ओ अधिकार सुनिश्चित कैना जिम्मेवारी युवा पुस्तामे रहल जनैटी शिक्षा, राजनिति लगायत हरेक क्षेत्रमे अग्रसर हुई पर्नामे जोड् डेली । भेलामे सहभागिहुकनके प्रश्नहे मध्यनजर करटी थाकसके उद्देश्यहे प्रष्ट परटी सामाजिक काम बाहेकके और कार्य थाकसके नीति बाहेर रहल थारु उल्लेख करली ।
अधिकार पैना आब थारु युवा पुस्ता चूप लागके बैठे नइहुइना बटैटी देशभरके थारु एक धिक्का हुके आघे बढ्नाके विकल्प नइरहल सदस्य थारु जानकारी डेली । अपने पूर्व मेचीसे पश्चिम महाकालीसमके जागरण अभियानके क्रमके अनुभव सुनैटी उहाँ कहली–‘अभियानके क्रममे एक जाने व्यक्ति महीहे प्रश्न करलैः हम्रे टे डगरमे फेकल कुरकुट हुइल बटी, टब मै कनु हम्रे कुरकुट हुइल बाटी मने उहे कुरकुटहे एक ठाउँमे जमा करके प्राङगरिक मल बनैना अभियानमे जुटल बटी एकदिन उहे मल खेतुवामे लैजाके डरबी ।’
थरुहट/थारुवान संघर्ष समितिके केन्द्रीय सदस्य किशोर विश्वास थारुहुकनहे भोट बैंकके रुपमे प्रयोग करल बटैलै । थारु समुदायके जन समुदायहे कम्युनिस्टसे काँंधमे बन्दुक धारके विगतमे प्रयोग करल मने अब्बे थारु समुदायहे अपहेलित करल उहाँ बटैलै । टिकापुरमे हुइल थरुहट आन्दोलनसे राज्य थारु समुदायके अगुवाहुकनहे एकएक करके जेलबन्दी बनैटी आइल सदस्य विश्वास बटैलै । थारुहुकनके अस्तित्व धरापमे हुइल बटैटी पुर्व मेचीसे पश्चिम कञ्चनपुरसमके थारु समुदाय एक हुके नइनेग्ना आपनत्व हरैना उहाँ बटैलै ।
विगतमे बनाइल थरुहट तराई लगायतके पार्टीसे थारु समुदायहे प्रयोग करके आत्मघाँटी व्यवहार करल विश्वास बटैलै । देशके डाइनेश्वर वा शक्तिशाली थारु हुइल जनैटी नेपाल जोगैना थारु समुदाय हुइल उहाँ जिकिर करलै । थारु समुदायके अस्तित्वहे बचैना चित्रण करटी संकटमे परल थारुके पहिचान बचैना अभियान चलैना सदस्य विश्वाससे जनैलै । उहाँ कहलै ‘थारु समुदायहे उत्तेजित हुइना अभिव्यक्ति डेहे प्रयोग कैगिल ।’
पुर्व सांसद विश्राम प्रसाद थारु थारुहुक्रे जागरुक हुइना आवश्यक रहल बटैलै । थारुसंग सम्बन्धित हरेक थारु अगुवा, संघ संस्था एकजुट हुइलेसे हातेमालो करके अस्तित्व बचाइक लाग अहम भुमिका खेल्ना जनैलै । थाकस केन्द्रीय सदस्य जंजिर प्रसाद थारु ओ सुमित्रा थारुसे थारु समुदायके हक, हित ओ अधिकारके निम्ति देशभर थारुहुक्रे एक्यवद्ध हुके आघे बह्रना जरुरी रहल बटैले बटै । थारु आन्दोलनके क्रममे जेल जीवन बिटैटी रहल थारु अगुवा जेलबन्दीहुकनहे रिहा नइकलेसे आन्दोलन शसक्ति हुइना बटैले बटै ।
थारु कल्याणकारी सभा कपिलवस्तु जिल्ला अध्यक्ष उमाशंकर थारु औरके लाग सयौ बरस लरल मने अपन लाग आब अन्तिम चो लरना बेला आइल बटैलै ।
