बघुवक आक्रमणसे १ के मौत
पहुरा समाचारदाता
धनगढी, २ फागुन । कैलालीमे बघुवक आक्रमणसे एक जनहनके मृत्यु हुइल बा । जिल्लाके गौरीगंगा नगरपालिका ५ स्थित अन्डैयामे पाटे बघवक आक्रमणमे परके एक महिलाके ज्यान गैल हो ।
डिभिजन वन कार्यालय कैलालीके प्रमुख रामचन्द्र कँडेल बघ्वक आक्रमणसे एक जनहनके मृत्यु हुइल पुष्टि करलै ।
स्थानीय चेतराज पुरीके अनुसार पुष्पाञ्जली सामुदायिक वनुवामे झाला काटे गैल महिलाहे उ बघ्वा आक्रमण करल रहे । उहे क्रममे स्थानीय २५ वर्षीया कला धामीहे आक्रमण करल पुरी जानकारी डेलै । ओहकान शव समेत भेटल जनाइल बा ।
कुछ दिन यहोर उ पाटे बघुवाके मुभमेन्ट कैलालीके सामुदायिक वनुवाम बह्रल बा । शुकके पाटे बघ्वा कैलारी गाउँपालिका–८ दुधियाके २८ वर्षिय दुर्गाप्रसाद चौधरी उपर आक्रमण करल रहे । सीताकुँवा सामुदायिक वनुवमो बघुवासे हुइल जम्काभेटमे चौधरी घाहिल हुइल बाटै । ओहकान नेपालगञ्जमे उपचार हुइटी रहल जनाइल बा ।
ओस्टके, शनिच्चरके मनै रहल ठाउँमे बघ्वा महेन्द्र राजमार्गमे निक्रल रहे । उहे दिन गौरीगंगा नगरपालिका–८ स्थित गौरीगणेश सामुदायिक वनुवामे गैयक एकठो बछरुवाहे मारके खाइल जनाइल बा ।
