बाघ नियन्त्रणमे ढिलाई हुइलपाछे ठप त्रास
पहुरा समाचारदाता
धनगढी, ५ फागुन । कैलालीमे रहल नरभक्षी बघुवाहे नियन्त्रणमे लेना ढिलाइ हुइलपाछे स्थानीय ठप त्रसित हुइल बाटै ।
बघुवा मनैन समेत मारे लागल पाछे उहीहे नियन्त्रणमे लेना ढिलाई होके उहीसे ठप मानवीय क्षति करे सेक्ना कहटी बघ्वा डेख्टी रहल क्षेत्रके स्थानीय त्रसित हुइल हुइट ।
नरभक्षी बाघ गौरीगंगा नगरपालिकाके बढैपुर, राजीपुर, अण्डैया ओ कैलारी गाउँपालिकाके दुधिया, उदासीपुर लगायतमे रहल सामुदायिक वनुवामे घुम्टी रहल बा । मनैनके ज्यान लेसेकल बघ्वाहे नियन्त्रणमे लेना ढिलाइ हुइटी रहल स्थानीय बटैले बाटै ।
बघ्वाके कारण पूर्वपश्चिम राजमार्गमे ओहोरदोहोर कैना समेत हीरा चौधरी बटैली । ‘नरभक्षी बघ्वाके कारण नियमित काममे जैना फेन डर हुइटी रहल बा,’ उहाँ कहली । शुकसे उ क्षेत्रमे बघ्वा आपन ‘मुभमेन्ट’ बह्रैले बा । मनै मारसेकल ओरसे उ बघ्वा नरभक्षी होसेकल बा । अँट्वारके फेन गौरीगणेश सामुदायिक वन क्षेत्र, बढैपुर–उदासीपुर सडकखण्ड क्षेत्रमे बघ्वा डेख परल रहे ।
नरभक्षी बाघके कारण मनैनमे त्रास फैलल् पाछे उ क्षेत्रमे सुरक्षाकर्मी परिचालन करल बा । बघ्वाके कारण थप मानवीय क्षति हुइ नैडेहक लाग सुरक्षाकर्मी परिचालन करल जिल्ला प्रहरी कार्यालय कैलालीके प्रवक्ता एवम् प्रहरी नायब उपरीक्षक प्रतीक विष्ट बटैलै ।
‘बघ्वा थप मानवीय क्षति नकरे कहिके बघ्वासे प्रभावित क्षेत्रमे सुरक्षाकर्मी खटाइल बा,’ उहाँ कहलै, ‘मने, बघ्वा नियन्त्रण कैना निर्देशन हम्रहीनहे आइल नैहो । उ काम उपकरणसहितके प्राविधिक टोलीके हो ।’ ओस्टके, बघ्वा थप मानवीय क्षति पुगाइ सेक्ना अवस्थाहे मध्यनजर कैटी सामुदायिक वन समन्वय समिति मसुरियासे उ क्षेत्रमे जहोर टहोर हिडडुल नैकैना सर्वसाधारणहे आग्रह करले बा ।
इहे बिच नरभक्षी बघ्वाके लोकेशन पत्ता लगाइक लाग क्यामेरा सेमत लगाइल बा । बघ्वा घुमफिर करटी रहल क्षेत्रमे क्यामेरा ट्रयाप करल डिभिजन वन कार्यालय कैलाली जानकारी डेले बा ।
‘सबसे पहिले बघ्वाके लोकेशन पत्ता लगैना आवश्यक बा,’ डिभिजन वन कार्यालयके प्रमुख रामचन्द्र कँडेल कहलै, ‘ओकर लोकेशन पत्ता लगाइक लाग चार ठाउँमे क्यामेरा ट्रयाप करल बा ।’ उहाँ आवश्यक परलेसे थप क्यामेरा फेन रख्ना बटैलै ।
बघ्वाहे बेहोस बनाके (डार्ट कैके) नियन्त्रणमे लेहक लाग सबसे पहिले ओकर लोकेशन पत्ता लगैना जरुरी रहल कँडेल बटैलै । ‘डार्टिङ करक लाग बघ्वा कहोर बा, कना पत्ता लगाइ पर्ना रहठ्,’ उहाँ कहलै ।
नरभक्षी बनसेकल वयस्क पाटेबघ्वा गौरीगंगा नगरपालिका ओ कैलारी गाउँपालिकाके सामुदायिक वनुवामे घुमफिर करटी रहल बा । दुधिया, उदासीपुर, बढैपुर, राजिपुर, अण्डैया क्षेत्रमे बघ्वाके मुभमेन्ट हरल बा । बघ्वा मुभमेन्ट करल क्षेत्र बसन्ता जैविकमार्ग अन्तर्गत परठ् ।
