अध्यक्ष कपके उपाधिके लाग महिलाओर वडा २ ओ ९ भिड्ना

पहुरा समाचारदाता
हसुलिया, ५ फागुन । कैलालीके कैलारी गाउँपालिका–३ स्थित उत्तर भडरीमे जारी टिसरा अध्यक्ष कप रनि· खेलकुद प्रतियोगिता अन्तर्गत मंगरके १ खेल सम्पन्न हुइल बा ।

महिला ओर हुइल सेमीफाइनल खेलमे वडा नम्बर २ से शुन्यके विरुद्ध ३ गोल कैटी फाइनल प्रवेश करले बा । वडा नम्बर ७ बिच हुइलमे खेलमे वडा नम्बर २ के खेलाडी किरण चौधरी, सरस्वती चौधरी ओ सारदा चौधरी १÷१ गोल कैके आपन टीमहे जित डेहुवाइल रहिट । फाइनल प्रवेश करलसंगे उपाधिके लाग फागुन ९ गते वडा नम्बर ९ के टोलीसे प्रतिस्पर्धा हुइना प्रतियोगिताके मिडिया संयोजक मिशन चौधरी जानकारी डेलै ।

ओस्टके सोम्मार हुइल पुरुष ओरके सेमीफाइनल खेलमे वडा नम्बर १ विजयी हुइल रहे । वडा नम्बर १ से वडा नम्बर ३ हे शुन्यके विरुद्ध २ गोल कैटी विजयी हुइल रहे । वडा नम्बर १ के सुरेश चौधरी रओ सुरज चौधरी १/१ गोल करल रहिट । फाइनल खेल वडा नम्बर १ ओ वडा नम्बर ६ बिच हुइना जनाइल बा ।

ओस्टके फागुन ५ गतेसे भलिबल प्रतियोगिता फेन सुरु हुइना जनाइल बा । भलिबल प्रतियोगिताके लाग १० टीमके सहभागिता रहल बा । ओस्टके फागुन ६ गते वृहत रक्तदान कार्यक्रम ओ ब्याटमिन्टन प्रतियोगिता फेन सञ्चालन हुइना जनाइल बा । ब्याटमिन्टनके लाग १६ टीमके सहभागिता रहल बा ।

कैलारी गाउँपालिका कार्यालयके सहयोगमे कैलारी स्मार्ट समन्वय युवा क्लबले प्रतियोगिताके आयोजना करल हो ।