पोषण प्याकेज सम्बन्धी अभिमूखीकरण
पहुरा समाचारदाता
धनगढी,५ फागुन । धनगढी उपमहानगरपालिकाके प्रमुख नृपबहादुर वड स्वास्थ्यकर्मी अपनही नमुना हुके काम करलपाछे ओकर अनुसरण और जे कैना बटैले बटै ।
बुधके रोज धनगढी उपमहानगरपालिकासे आयोजना करल स्वास्थ्यकर्मीहुकनके बृहत पोषण प्याकेज सम्वन्धी अभिमूखीकरण कार्यक्रमके उदघाटन करटी नगरप्रमुख वड यैसिन धारणा राखल हुइट । ‘स्वास्थ्यकर्मीहुकनके सामाजिक उत्तरदायित्व ढेर हुइना करठ,’ नगरप्रमुख वड कहलै, ‘टबमारे अपने नमुना हुके काम करबी ।’ नगरप्रमुख वड अपने काम कैना स्वास्थ्य संस्थाके वरपर सफा धरलेसे ओकर प्रभाव समाजमे पर्ना बटैलै ।
धनगढी उपमहानगरपालिकाके प्रमुख प्रशासकीय अधिकृत हरिबहादुर चन्द स्वास्थ्यकर्मीहुकनके व्यवहारसे केल आधारोग ठिक हुइना बटैलै । स्वास्थ्यकर्मीहुक्रे उपचार ओ परामर्श डेहे कैना व्यवहार बिरामी जिवनभर सम्झना बटैलै ।
धनगढी उपमहानगरपालिका स्वास्थ्य शाखा प्रमुख डाक्टर खगेन्द्र बम अभिमूखीकरण कार्यक्रमके उदेश्यके बारेमे प्रकाश पारल रहिट । अभिमूखीकरण कार्यक्रम ७ दिनसम संचालन हुइना बा ।
