झोलुङे पुलके उद्घाटन
पहुरा समाचारदाता
हसुलिया, ५ फागुन । कैलालीके कैलारी गाउँपालिका–९ स्थित घुरहा लडियामे निर्माण हुइल झोलुुङे पुलके बुधके उद्घाटन करल बा ।
कैलारी गाउँपालिकाके अध्यक्ष लाजुराम चौधरी झोलुङे पुलके उद्घाटन करल हुइट । उ पुल निर्माणसे वडा नम्बर ९ के सामरचौरा, शितलपुर लगायतके गाउँके स्थानीयहे ओहोरदोहोर कैना सहज हुइना बा ।
कुल ८८ लाख ६६ हजार रुप्या लगानीमे पुल बनल झोलुङे पुल उपभोक्ता समितिके अध्यक्ष रामसमझ चौधरी बटैलै । मने, उपभोक्ता समितिमार्फत ३९ लाख ८५ हजार रुप्या केल कारोबार हुइल उहाँ उहाँ जनैलै । ‘बाँकी रुप्याके सामान केन्द्रसे आइल रहे, उहाँ कहलै ।
पुलके लाग समितिहे केन्द्रसे ३२ लाख ७८ हजार, कैलारी गाउँपालिकाके कार्यालयसे पाँच लाख ३० हजार सहयोग हुइल जनाइल बा । ओस्टेक करके, जनश्रमदानसे एक लाख ७६ हजार रुप्या सहयोग हुइल जनाइल बा ।
झोलुङे पुल उद्घाटन अवसरमे वडा नम्बर ९ के वडाध्यक्ष खेमराज चौधरी, नेकपाके नेता बतासु चौधरी, स्थानीय लगायतके उपस्थिति रहल रहे ।
