पेट्रोलियम पदार्थके मूल्य वृद्धि

पहुरा समाचारदाता
धनगढी, ५ फागुन । नेपाल आयल निगमसे पेट्रोलियम पदार्थके मूल्य समायोजन करले बा । समायोजन करल मूल्य मंगरके रात १२ बजेसे लागू हुइल बा । निगमसे डिजेल, पेट्रोल, मट्टितेल आन्तरिक हवाई इन्धनके मूल्य प्रतिलिटर दुई रुपैयााके दरसे वृद्धि करल हो ।

मूल्य वृद्धिपाछे काठमाडौं उपत्यकामे पेट्रोल प्रतिलिटर ११४, डिजेल तथा मट्टितेलके ९७ ओ आन्तरिक हवाई इन्धनके मूल्य प्रतिलिटर ६७ रुपैयाँ कायम करल निगमके प्रवक्ता विनितमणि उपाध्याय जानकारी डेलै । मूल्य समायोजनपश्चात् फेन निगमहे पेट्रोलमे प्रतिलिटर पाँच रुपैयाँ ८२ पैसा, डिजेलमे प्रतिलिटरर चार रुपैयाँ १३ पैसा ओ खाना पकैना एलपी ग्यासमे २९५ रुपैयाँ ८३ पैसा घाटा बा । अर्धमासिक रुपमे करिब ८६ करोड ७८ लाख रुपैयाँ घाटा नै रहना बा ।

उ घाटा रकम मूल्य स्थिरीकरण कोष तथा निगमके सञ्चित नाफासे व्यवस्थापन करजैना बा । मूल्य समायोजनपश्चात फेन भारतीय सीमा रक्सोलसे जोरल नेपालके वीरगञ्ज क्षेत्रमे पेट्रोल प्रतिलिटर ३५ रुपैयाँ २९ पैसा ओ डिजल प्रतिलिटर ४१ रुपैयाँ ४३ पैसा नेपाल ओर सस्ता रहल निगमके प्रवक्ता उपाध्यायसे जारी विज्ञप्तिमे उल्लेख रहल बा ।