नरभक्षी बघुवाहे पक्रना हाली प्रयास करी

कैलाली जिल्लाके कैलारी गाउँपालिका ८ दुधिया निवासी २८ वर्षिय दुर्गा चौधरीहे मुनाहस घाहिल बनाइक नरभक्षी बघुवा दुई दिन बिराके गौरीगंगा नगरपालिका–५, अण्डैया निवासी कला धामीके ज्यान लेहलपाछे स्थानीयहुकनमे त्रास फैलल बा । कुछ दिन यहोर कैलालीमे नरभक्षी बघुवा आतंक मचाई सुरु करलपाछे उहीहे मारक लाग जिल्ला सुरक्षा समिति कैलालीके अँट्वारके बैठल बैठके सुरक्षाकर्मी परिचालन करटी सशस्त्र ओ जनपथ प्रहरीहे खटैले बा, मने पक्रे नइसेक्जागिल हो । कैलालीके प्रमुख जिल्ला अधिकारी यज्ञराज बोहरा कुछ दिन यहोर अपनेहुक्रे बघुवाके गतिविधिहे गम्भीर रुपमे लेहल ओ व्यवस्थापन कैना मातहतके निकायहे परिपत्र करल बटैले बटै ।

दुर्गा चौधरीहे गैल शुकके रोज स्थानीय सीताकुँवा सामुदायिक वनुवामे भोजहा पटिया टुरे गैल बेला आक्रमण कैके घाहिल बनाइल रहे । ओहकान हाल नेपालगञ्जमे उपचार हुइटी रहल बटिन । कलेसे दुई दिनपाछे अँट्वारके स्थानीय पुष्पाञ्जली सामुदायिक वनुवामे झालापाटा लेहे गैल बेला बघुवा आक्रमण कैके धामीके ज्यान लेहल रहे ।

बघुवा मनैन समेत मारे लागल पाछे उहीहे नियन्त्रणमे लेना ढिलाई होके उहीसे ठप मानवीय क्षति करे सेक्ना कहटी बघुवा डेख्टी रहल क्षेत्रके स्थानीय त्रसित हुइल बटै । नरभक्षी बाघ गौरीगंगा नगरपालिकाके बढैपुर, राजीपुर, अण्डैया ओ कैलारी गाउँपालिकाके दुधिया, उदासीपुर लगायतमे रहल सामुदायिक वनुवामे घुम्टी रहल स्थानीय बटैलै । अँट्वारके फेन गौरीगणेश सामुदायिक वन क्षेत्र, बढैपुर–उदासीपुर सडकखण्ड क्षेत्रमे बघुवा डेख परलपाछे पूर्वपश्चिम राजमार्गमे ओहोरदोहोर करटी रहल समेत स्थानीय हीरा चौधरी बटैठी । बघुवा मुभमेन्ट करल क्षेत्र बसन्ता जैविकमार्ग अन्तर्गत परठ् ।

नरभक्षी पाटे बघुवाहे सेकटसम ‘डार्ट’ कैके (बेहोस बनाके) नियन्त्रणमे लेना हो । नैहुइलेसे मर्नासमके कानुनी प्रावधान बा । बघुवाहे नियन्त्रणमे लेहक लाग डिभिजन वन कार्यालय उप्पर निकायसे पहल हुइटी रहल जनैले बा । जिल्ला प्रहरी कार्यालय कैलालीके प्रहरी नायव उपरीक्षक प्रतीक बिष्टसे पाटे बघुवाहे प्रभावित क्षेत्रमे सुरक्षाकर्मी तैनाथ करल जानकारी डेलै । प्रभावित क्षेत्र जिल्लाके गौरीगंगा नगरपालिका ओ कैलारी गाउँपालिका क्षेत्रमे सुरक्षा बह्रैले बाटी, सेकटसम नियन्त्रण कैना हो, नै हुइलेसे मर्ना आदेश आइल बटैलै ।

वन्यजन्तुसे मानवीय क्षति करलमे नेपाल सरकारसे क्षतिपूर्ति वाफत १० लाख रुप्या डेना व्यवस्था बा, बघुवाके आक्रमणसे ज्यान गुमाइल गौरीगंगा नगरपालिका–५, अण्डैयाके कला धामीके परिवारहे क्षतिपूर्ति वाफत १० लाख रुप्या डेना जनाइल बा । ओस्टके, बघुवाक घाहिल बनाइल दुर्गाहे फेन उपचार खर्च डेना कहल बा ।

बघुवा ठप मानवीय क्षति नकरे कहिके प्रभावित क्षेत्रमे सुरक्षाकर्मीके साथे उपकरणसहितके प्राविधिक टोली खटैना जरुरी बा । नरभक्षी बघुवक लोकेशन पत्ता लगाइक लाग क्यामेरा जडान करलेसे हाली नियन्त्रण करे सेक्जाई । ओ ठप मानवीय क्षतिसे बचाई सेक्जाई ।