‘भुमिका’ नाटकमार्फत छाइन्के पीडा प्रस्तुत

पहुरा समाचारदाता
धनगढी, ६ फागुन । कैलालीके गोदावरी नगरपालिका अत्तरियामे ‘भुमिका’ नामक नाटक प्रदर्शन करल बा । एभरेष्ट एकेडेमीसे आयोजनामे नाटक प्रस्तुत करगिल हो । नाटकके कलाकार एकेडेमीमे अध्ययनरत छात्रछात्रा रहल रहिट । नाटक मार्फत छाइ होके जन्मना ओ छाइ हुलके कारण समाजमे भोगे परल पीडाहे चित्रण करल रहे ।

सुदूरपश्चिमके चेली निर्मला पन्त, भागरथी भट्ट, माया विक लगायत जेकर बलात्कारपाछे विभत्स हत्या हुइल बा । नाटकमे ओइसीन चेलीहुक्रनके भुमिकाहे चित्रण करक लाग भुमिका नाटक निर्माण करल जनाइल बा ।

धनगढी ओ अत्तरियाके अधिकारकर्मीहुक्रनके सहभागितामे उ नाटक प्रदर्शन करल रहे । नाटक प्रर्दशन पाछे नाटकसे समाजमे घटल घटनाहे सहि रुपमे चित्रण करल सहभागिहुक्रे बटैले बाटै ।
नाटक हेरके सहभागिहुक्रे भावविह्ल बने पुगल रहिट । समाजमे घटल घटनाहे कहिकतै तोडमोड नैकैके डेखाइल नाटक सत्य घटनामे आधारित किल नैहोके मन छुना मेरके निर्माण हुइल महिला अधिकारकर्मी सावित्री घिमिरे बटैली । नाटक हेरके मै आँश रोके खोजलमे फेन नैरुकल, नाटक हेरे धनगढीसे अत्तरिया गैल उहाँ फलदायि हुइल प्रतिक्रिया डेहल रही ।

छाइ होके पाइल दुःख कत्रा दर्दनाक रहठ्, महिला अष्मिताउपकरे प्रहार नाटकसे छताछुल्ल पारल कहटी समाज परिवर्तन ओ हमार समाजभिट्टरके विकृतिहे नाटकसे उजागर करे खोजल प्याब्सन गोदावरीके अध्यक्ष जगदिश थापा बटैलै । भुमिका नाटकसे छाइनके भुमिका खोज्टी रहल बा । समाजके यथार्थ चित्रण भुमिकामे प्रष्ट डेखे सेकजाइठ् । नाटकमे सहभागिताके लाग अर्थपुर्ण सहभागिता किल जुटल नैरहे सहभागिहुक्रे करिव आधा घण्टाके नाटक हेरके आँख रसाइल रहे । एक अँठ्वारके तयारीमे तयार पारल नाटकसे पीडामे परल छाइचेलीनके बाध्यात्मक परिस्थितिहे उठैना प्रयास करल रहे ।

नाटक नाट्य कलाकार पुष्पराज अवस्थीके लेखन÷निर्देशन ओ सुनिल पन्तके कोरियोग्राफिमे प्रदर्शन करल रहे । सुदूरपश्चिमके भाषासंस्कृतिहे उजागर कैना मेरके इ मेरके नाटकके आयोजना करल एभरेष्ट एकेडेमीका प्राचार्य स्माइल चौधरी बटैलै । छाइनउपर हुइटी रहल अन्याय अत्याचार विरुद्धके अभियानके रुपमे नाटक प्रदर्शन करल उहाँ बटैलै ।

उहे बिच सुदूरपश्चिम प्रदेशभिट्टर नाट्य घर स्थापनाके लाग अभियान चलैना तयारी हुइटी रहल नाट्य लेखक एवं निर्देशक अवस्थी बटैले बाटै । प्रतिभाहुक्रनके खोजी ओ लावा लावा प्रतिभा जन्मैना माध्यम नै नाट्य घर रहल ओरसे यकर लाग अभियान नै चलाके आघे बह्रना तयारी हुइटी रहल जानकारी कराइल हुइट । अन्य प्रदेशमे नाट्य घर स्थापना होसेकल अवस्थामे सुदूरपश्चिम प्रदेश पाछे नै परे परल कना उद्देश्य सहित हाली इ अभियानमे जुट्ना नाट्य लेखक एवं निर्देशक अवस्थी बटैलै ।

प्रदेशभिट्टर नाट्य घर स्थापनाके लाग अपनेहुक्रे फेन सेक्नासम सहयोग ओ पहल कैना अत्तरिया उद्योग वाणिज्य संघके अध्यक्ष अशोकराज देवकोटा बटैलै । अन्य प्रदेशमे नाट्य घर स्थापना होसेकल अवस्थामे यहाँ किल नैहुइना दुःखद रहल बटैटी उहाँ ओकर लाग व्यक्तिगत ओ संस्थागत रुपमे सहयोग कैना तयार रहल बटैलै ।