भारतओर लैजैटी रहल महिलाके उद्धार
कञ्चनपुर, ६ फागुन । प्रलोभनमे पारके ललापकाके भारत ओर लैजैटी रहल महिलाहे सीमा नाका डोकेबजारसे उद्धार करल बा ।
कैलालीके घोडाघोडी नगरपालिका–५, बेलार बैठुइया ३५ बरसके रामदिन डगौरा उहे नगरपालिका–१, कौवापुर बैठुइया प्रेम लुहारके गोसिनीया सिता लुहार (३२ वर्षीय) हे भारत लैजैटी रहल अवस्थामे उद्धार करल हो । सशस्त्र प्रहरी बल नेपाल नम्बर ३५ हेडक्वाटर शैलेश्वरीके सशस्त्र प्रहरी उपरीक्षक वीरेन्द्र बहादुर ऐर भारत ओर लैजैटी रहल उहाँहे उद्धार करल बटैलै । ओहकान अनुसार उद्धार करल महिला सहित डगौराहे आवश्यक कार्वाहीके लाग प्रहरी चौकी त्रिनगरमे बुझाइल बा ।
उहे बिच पुर्नवास नगरपालिका–४, कार्गिलडाँडा स्थित नेपाल–भारत सीमा क्षेत्रसे लागुऔषधसहित सशस्त्र प्रहरीसे गैल रात एक जनहनहे पक्राउ करल बा । पक्राउ परुइयामे धनगढी उपमहानगरपालिका–१, शिवमन्दिर बैठुइया ३० बरसके सद्दाम मिया रहल बाटै ।
मियासे चलाइल से ४ प ७७६७ नम्बरके मोटर साइकल सहित लागुऔषध प्याइभोन स्पास प्लस १० गोटा चक्की, नेट्राभेट दुई चक्की ओ एक ग्राम खैरो हिरोइन बरामद करल सशस्त्र प्रहरी उपरीक्षक वीरेन्द्र ऐर बटैलै । पक्राउ परेका मियाहे आवश्यक कारवाहीके लाग इलाका प्रहरी कार्यालय त्रिभुन वस्तीमे बुझाइल बा ।
