लकडाउन अवधीके आधा भाडा छुट

पहुरा समाचारदाता
धनगढी, ६ फागुन । नगरविकास समिति धनगढीसे लकडाउनके अवधीके ५० प्रतिशत भाडा छुट कैना निर्णय करल हो ।

बिफेक बैठल नगरविकास समितिके बैठकसे नगरविकास समितिके कम्प्लेक्स भवनके सटर, घर भाडामे लेके बैठल व्यवसायी तथा सर्वसाधारणके लकडाउन अवधीके भाडा छुट कैना निर्णय करल हो । कम हुइलेसेफे यी नगरविकासके भवनमे भाडामे बैठलहुकनहे राहत पुग्न हुइल बा ।

नगरविकास समिति धनगढीके अध्यक्ष तथा धनगढी उप–महानगरपालिकाके नगरप्रमुख नृपबहादुर वड कहलै, ‘ लकडाउनके कारण नगर विकास समेत प्रभावित हुइल ओरसे पुरे छुट करे नइसेक्गिल ।’ अब्बे नगर विकास समितिके अध्यक्षफे नगरप्रमुख रहन प्रावधान बा ।

धनगढी उपमहानगरपालिकासे लकडाउन अवधीके भाडादर ५० प्रतिशत छुट कैना निर्णय यी आघे करल नगरप्रमुख वड बटैलै ।