त्रिवेणी कृषि सहकारीके उद्घाटन

पहुरा समाचारदाता
पहलमानपुर, ८ फागुन । कैलालीके घोडाघोडी नगरपालिका वडा नम्बर १२ त्रिवेणी बजारमे त्रिवेणी कृषि सहकारी संस्था लिमिटेडके उद्घाटन हुइल बा ।

शनिच्चरके रोज एक कार्यक्रमके विच उ सहकारीके उद्घाटन घोडाघोडी नगरपालिका वडा नम्बर १२ के वडाध्यक्ष पर्नाकुमार चौधरी करल रहिट । सहकारीके अध्यक्ष रेनुका चौधरीके अध्यक्षतामे हुइल कार्यक्रमके खास पहुना दिगो तथा वातावरण बहुउद्देश्यीय सहकारी संस्था लिमिटेडके सदस्य आशाराम चौधरी रहल रहिट ।

कार्यक्रममे पहुरा दैनिकके पहलमानपुर शाखा प्रमुख जीवन चौधरी, घोडाघोडी नगरपालिका वडा नम्बर १२ के सदस्य मानबहादुर थारु, त्रिवेणी सहकारीके सदस्य राजेन्द्र चौधरी लगायत मन्तव्य व्यक्त करल रहिट ।

कार्यक्रमके संचालन त्रिवेणी सहकारीके सदस्य रामदास थारु ओ स्वागत गायक तुफान राजवंशी करल रहिट ।