सिविनसे धनगढी उपमहानगरपालिकाहे सम्मान

पहुरा समाचारदाता
धनगढी, ११ फागुन । बाल– बालिकाहुकनके क्षेत्र क्रियाशिल संस्था सिविन नेपालसे धनगढी उपमहानगरपालिकाहे सम्मान प्रदान करले बा ।

अपन ३३ औं स्थापना दिवसके अवसरमे धनगढी उपमहानगरपालिकाहे सम्मान प्रदान करल हो । बालबालिकाहुकनके संरक्षणमे महत्वपूर्ण भूमिका खेलल तथा सिविन नेपालके हरेक कार्यक्रममे समन्वय ओ सहकार्य मार्फत योगदान पुगाइल कहटी धनगढी उपमहानगरपालिकाहे सम्मान करल हो । सम्मानपत्र नगरप्रमुख नृपबहादुर वडसे ग्रहण करले रहिट ।

धनगढि उपमहानगरपालिकाके नगर प्रमुख नृपबहादुर वड कोरोना कहरमेफे सिविनसे क्वारेनेटिनमे रहल बालबालिकाहुकनहे व्यवस्थापन कैना महत्वपूर्ण भुमिका खेलल बटैलै । धनगढी उपमहानगरपालिकाहे सम्मान करलमे सिविन नेपालसंग आभारी बाटी नगरप्रमुख वड कहलै, ‘अइना दिनमेफे उपनगरपालिका ओ सिबिन नेपालसंंगसंगे आघे बह्रबी ।

धनगढी उपमहानगरपालिकाके उपप्रमुख सुशीला मिश्र भट्ट बालबालिका संरक्षणके क्षेत्रमे सिविन नेपालके महत्वपूर्ण योगदान रहल बटैली । उहाँ कहली, सिविनके कारण ढेर बालबालिका लौवा जीवन समेत पैले बटै । समस्यामे परल बालबालिकाके संरक्षणके लाग अपनेहुक्रे सदा तत्पर रहल सिविन नेपाल कैलालीके संयोजक बिष्णु पौडेल बटैली ।

पछिल्का समय बालबालिका उप्पर घटटी रहल घटनासे भारी चुनौती ठपल बा, संयोजक पौडेल कहली, ‘बालबालिकाके सुरक्षामे प्रदेश ओ स्थानीय सरकारके महत्वपूर्ण भूमिका रहल बा ।