थरुहट युवन्के बर्दिया जिल्ला भेला
पहुरा समाचारदाता,
बर्दिया, ११ फागुन । थरुहट/थारुवान राष्ट्रिय युवाशक्तिके बर्दिया जिल्ला भेला सनिच्चरके निम्जल बा ।
खुमानन्द थारुके संयोजकत्व ३५ सदस्य सहित युवाशक्तिके गठन राजापुर बर्दिया कटेज लेगके सभाहल म हुइल रहे । थरुहट थारुवान राष्ट्रिय युवाशक्तिके केन्द्रीय संयोजक सिताराम थारुक घरगोस्याइ म हुइल कार्यक्रम म थरुहट थारुवान राष्ट्रिय मोर्चाके प्रवक्ता मिनराज थारु बरका पहुनाके रुपम उपस्थित रहै ।
लम्मा समयमसे थारु समुदाय उप्पर कैगिल दमन, विभेद ओ अन्याय विरुद्ध आबके युवा पुस्ताहुक्र बिद्रोह कर नैसेक्ही कलसे आब्ब जोन अवस्थम बाटि यिहिसे फे आउर नाजुक अवस्थम थारु समुदाय जाइ सेकी ओ हमार लर्कापर्का फेरसे कमैया कमलहरी बन्ना स्थिति आइसेकि कना बात संयोजक थारु बटैल ।
ओस्टक पार्टी ओ जाति से एक कदम उप्पर उठ्के साझा मुद्दा समानता, न्याय ओ अधिकारके लाग ओ दासता विरुद्धके अभियानहन सफल बनाइक लाग सक्कु जे एकजुट होके लागक पर्ना बाट प्रवक्ता थारु बटैल ।
यिह फागुन १५ ओ १६ गते कैलालीके हसुलियामे थरुहट/थारुवान राष्ट्रिय मोर्चाके सम्मेलन हुइ जाइटा । ओकर तयारीके सिलसिलामे मोर्चाके मेरमेरिक समिति गठन हुइटि बा ।
ओस्टेके कैलालीके थरुहट/थारुवान मोर्चासे सुशीला चौधरीके संयोजगत्वमे २५ सदस्यीय जिल्ला महिला समिति गठन हुइल बा ।
