‘नेपाल पत्रकार महासंघ समावेशी संस्थाके रुपमे विकास’
पहुरा समाचारदाता
जोशीपुर, ११ फागुन । पत्रकारहुक्रनके छाता संगठन नेपाल पत्रकार महासंघ समावेशी संस्थाके रुपमे विकास हुइल नेपाल पत्रकार महासंघके केन्द्रिय वरिष्ठ उपाध्यक्ष विपुल पोखरेल बटैले बाटै ।
नेपाल पत्रकार महासंघ कैलाली शाखाके ११औं साधारण सभा तथा रजत जयन्तीके अवसरमे कैलालीके जोशीपुरमे आयोजित सभाहे सम्बोधन कैटी वरिष्ठ उपाध्यक्ष पोखरेल महासंघ यहाँ पुगटसम समावेशी संस्थाके रुपमे विकास हुइल बटैलै ।
‘महासंघ जिल्लासे केन्द्रसम एकठो समावेशी संस्थाके रुपमे विकास हुइल बा,’ वरिष्ठ उपाध्यक्ष पोखरेल कहलै–‘यहाँ आदिवासी जनजाति, दलित, मधेसी लगायतहुक्रनके प्रतिनिधित्व सुनिश्चित हुइल बा ।’
ओस्टके उहाँ अब्बेसम महासंघ ढिउर उपलब्धी फेन हासिल करल बटैलै । उहाँ हरेक साधारण सदस्यहुक्रनके मताधिकार सुनिश्चित, लोकतन्त्रके उच्चतम अभ्यास, श्रमजिवी पत्रकारहुक्रनके हकहित लगायत विषयमे उप्लब्धी हासिल करल बटैलै ।
कार्यक्रममे अग्रज पत्रकार घनबहादुर शाह पत्रकारिता पेशा मर्यादित पेशा रहल ओरसे सक्कु मिडियाकर्मीहुक्रनहे इमान्दारिपूर्वक पेशाके सम्मान कैटी आपन कतब्य निभाइ पर्ना औंल्याइल रहिट ।
कार्यक्रममे पूर्व केन्द्रिय सदस्य करुणाकरण पाण्डे, मनमोहन स्वाँर, उमिद बागचन्द, कर्णशाह, नेपाल पत्रकार महासंघके उपाध्यक्ष दुर्गा भण्डारी, चाँदनी आचार्य, महासचिव योगेश रावल, नेपाल आदिवासी जनजाति पत्रकार महासंघके प्रदेश अध्यक्ष भीम चौधरी, थारु पत्रकार महासंघके केन्द्रिय उपाध्यक्ष उन्नती चौधरी लगायत शुभकामना मनतब्य राखल रहिट ।
उहे बिच वरिष्ठ पत्रकारहुक्रनहे सम्मान फेन करगैल रहे । सम्मानित हुउइयामे वरिष्ठ पत्रकार घनबहादुर शाह, करुणाकर पाण्डे, उमिद बागचन्द, मनमोहन स्वाँर, शिद्धराज भट्टहे सम्मानित करगिल रहे । ओस्टके जय पृथ्वीबहादुर सिंह पत्रकारिता पुरस्कारसे पूर्व सभापति स्वर्गीय लिलानाथ ओझाहे मरणोपरान्त सम्मान करगिल बा ।
उहे बिच हुइल बन्द सत्रमे सचिव मीन ठकुरी सांगठनिक प्रतिवेदन सुनाइल रहिट । सचिव ठकुरी पत्रकार महासंघके भवन निर्माण, कार्यालय व्यवस्थापन, सदस्यहुक्रनके अभिलेखिकरण लगायत महासंघसे टमान समयमे आयोजना करल क्षमता अभिवृद्धिके तालिम, कोभिडके समयमे समस्यामे परल पत्रकारहुक्रनहे खाद्यान्न सहयोग, दुर्घटना तथा दुःख विमार परल पत्रकाहुक्रनहे आर्थिक सहयोग, पत्रकारहे आइल धाकधम्की बारे पत्रकार महासंघसे न्यायके लाग खेलल् भूविका बारे प्रतिवेदन सुनाइल रहिट ।
ओस्टके कोषाध्यक्ष हिमाल जोशी आर्थिक वर्ष २०७५ से २०७७ माघ मसान्तसमके १२ लाख ९४ हजार रुप्या बराबरके आयव्यय प्रस्तुत करल रहिट ।
कार्यक्रममे स्वागत उपाध्यक्ष टंक कुँवर करले रहिट कलेसे कार्यक्रमके सञ्चालन सचिव मीन ठकुरी करले रहिट । नेपाल पत्रकार महासंघ कैलाली शाखामे अब्बे २ सयसे ढिउर साधारण सदस्य रहल बाटै ।
