फागुन महिना भर निसर्ग हस्पिटलके निःशुल्क स्वास्थ्य शिविर
पहुरा समाचारदाता
धनगढी, १२ फागुन । धनगढीमे रहल सुविधा सम्पन्न निसर्ग हस्पिटल एण्ड रिसर्च सेन्टर प्रालि फागुन महिना भर निःशुल्क स्वास्थ्य शिविर सञ्चालन करले बा ।
फागुन १ गतेसे पुरै महिना संचालन हुइना शिविरमे नेपालगञ्ज मेडिकल कलेजमे काम करसेकल छाला, यौन, कुष्ठरोग तथा सौन्दर्य विशेषज्ञ डाक्टर सुमित पाण्डे, चितवन मेडिकल कलेज, चितवन ओ अल्का हस्पिटल, काठमाडौंके पूर्व कार्यरत नाक, कान, घाँटीरोग विशेषज्ञ डाक्टर सुमन थापा, न्युरो हस्पिटल बासबारी काठमाडौं ओ गण्डकी मेडिकल कलेज पोखरामे पूर्व कार्यरत वरिष्ठ न्युरो सर्जन डाक्टर सुरेश सापकोटासे सेवा डेना हुइल बाटैं ।
शिविर अवधीभर चर्म, यौन तथा सौन्दर्य विशेषज्ञ डाक्टरसे शरीर खुज्यैना, पुरान दाद, कपाल झरना, कुष्ठरोग तथा नशा झमझमैना, यौन रोगके उपचार तथा परामर्श सेवा प्रदान करना हुइल बा ।
नाक, कान, घाँटी रोग विशेषज्ञ तथा हेड एण्ड नेक सर्जन डाक्टरसे पिनास, नाकमे मास आइल, टंन्सिल, कान कम सुन्ना, कान नैसुन्ना, कानसे पिप बहना समस्याके उपचार तथा अप्रेशन सेवा प्रदान करटी बा ।
न्युरो सर्जन विशेषज्ञ डाक्टरसे कपरा पिरैना, गर्दन, ढाड तथा कम्मर पिरैना समस्या, नशा डबल वा डबल समस्या, कपार तथा मेरुदण्डके चोटलागल समस्या, छारे रोग वा मृगीके समस्या, प्यारालाइसिस वा पक्षघातके समस्या, हातगोर झमझम करना वा लुल हुइना जैसिन समस्याके उपचार तथा अप्रेसन सेवा प्रदान करटी आइल बा ।
स्वास्थ्य शिविर हरेक दिन बिहान ९ बजेसे साँझ ५ बजेसम सञ्चालन हुइटीरहल हस्पिटलके अध्यक्ष तीर्थराज पन्त जानकारी डेलैं ।
अस्पतालसे निःशुल्क स्वास्थ्य शिविर फागुन महिनाभर सञ्चालन करना अध्यक्ष पन्त बटैलैं । शिविर सञ्चालन हुइलेसे फेन अन्य समयमे हस्पिटल पूर्णकालीन (२४ सैं घण्टा) छाला, यौन, कुष्ठरोग तथा सौन्दर्य, नाक, कान, घाँटीरोग विशेषज्ञ ओ न्युरो सर्जन विशेषज्ञ सेवा फेन थप करल अध्यक्ष पन्तले जानकारी डेलैं ।
शिविर अवधीभर ल्याब टेस्टलगायत सक्कु जाँचमे २० प्रतिशत छुट ओ अप्रेशन शुल्कमे फेन २० प्रतिशत छुटके व्यवस्था करल सञ्चालक कुवेरबहादुर शाही बटैलैं ।
