मुरगीपालक कृषकहुकनहे रकम हस्तान्तरण
पहुरा समाचारदाता
धनगढी, १४ फागुन । धनगढी उपमहानगरपालिका वडा नम्बर १ ओ २ के मुरगीपालक कृषकहुकनहे रकम हस्तान्तरण कैगिल बा ।
जिआइजेडके आर्थिक सहयोगमे लिवर्ड ओ याक नेपालके सहकार्यमे संचालित ‘पारिवारीक खेती सवलीकरण परियोजना’ अन्तर्गत मुरगीपालक २ सय ४० कृषकहुकनहे व्यावसाय संचालनमे सहयोग पुगी कहिके १६ सय रुप्याके दरसे रकम हस्तान्तरण कैगिल हो ।
उ रकम हस्तान्तरण वडा नम्बर २ के अध्यक्ष नरबहादुर बम, वडा सदस्य रत्ना ओली, मानबहादुर सिंह, याक नेपालके अध्यक्ष धनबहादुर रावल, नेपाल रेडक्रस सोसाइटी कैलालीके पूर्व महामन्त्री सीताराम जोशी, समाजसेवी, महिला स्वयसेविका, टोलविकास समितिके प्रतिनिधिसे हस्तान्तरण कैगिल याक नेपालके प्राविधिक संयोजक कृष्णबहादुर बोहरा जनैलै ।
उ परियोजनाके कार्यक्षेत्रमे रहल वडा नम्बर १ ओ २ के उ कृषकहुकन गिरिराज मुरगीक चिङनी डेना ओ तालिमफे संचालन करके लेबल १ के प्रमाणपत्रफे डेना प्राविधिक संयोजक बोहरा बटैलै । उहाँ कहलै, ‘याक नेपाल ओ नविल बैक सम्झौता करले बा, तालिम पश्चात प्रमाणपत्र पैना व्यक्ति प्रमाणपत्र धारके विना धितो व्यावसायिक लोन लेहे पैही ।’
कोरोनासे प्रभावित हुके विदेशसे स्वादेश लौटल दुनु वडाके २÷२ सय करके ४ सय घरधुरीमे याक नेपाल सदस्य बनाके विपन्न ओ अति विपन्न घुरधुरीमे काम करटी रहल संयोजक बोहरा जनैलै । ओस्टेक ५ सय जनहनहे बसन्ते ओ हिउदे टिना खेतीके लाग सहयोग करल उहाँ जनैलै ।
नगद हस्तान्तरण कार्यक्रममे वडा अध्यक्ष नरबहादुर बम याक नेपालसे संचालन करल ‘पारिवारीक खेती सवलीकरण परियोजना’ सरकारसे कैना काम करटी रहल बटैलै । उहाँ कहलै, टिना खेती ओ मुरगीपालक किसान व्यावसायिक रुपमे जाई पर्ना जरुरी बा ।’
