कृषकहे कृषियन्त्र पावर टिलर वितरण

भजनी, १६ फागुन । कृषि ज्ञान केन्द्र कैलालीसे कृषक समूहहे खेती उत्पादनमे सघैना उद्देश्यसे कृषियन्त्र पावर टिलर वितरण करले बा ।

ज्ञान केन्द्रसे कैलालीके भजनी नगरपालिका–२ रजवाराके गोहुँ ब्लक सञ्चालक समिति ओ जोशीपुर गाउँपालिका–३ मनिकापुर कृषि समूहहे पावर टिलर हस्तान्तरण करल हो । कृषक समूहहे कृषिओर गोहुँबाली उत्पादनमे सहयोग पुगैना पावर टिलर हस्तान्तरण करल बताइल बा ।

सुदूरपश्चिम प्रदेशके भूमि व्यवस्था कृषि तथा सहकारी मन्त्रालयअन्तर्गतके कृषि यान्त्रीकरण वितरण कार्यक्रमअन्र्तगत कृषि ज्ञान केन्द्रसे भजनी नगरपालिकाके रजवार गोहुँ ब्लक समिति ओ जोशीपुर गाउँपालिकाके मनिकापुर कृषक समूहहे पावर टिलर हस्तान्तरण करल हो । कृषि ज्ञान केन्द्रसे रजवार गोहुँ ब्लक समितिहे छ थान पावर टिलर हस्तान्तरण करल । ‘कृषि कार्यमे लागत घटाके उत्पादनमे वृद्धि कैना गोहुँ ब्लक समितिहे पावर टिलर हस्तान्तरण करल हुई’, कृषि ज्ञान केन्द्र कैलालीके कृषि प्रसार अधिकृत रामनारायण चौधरी कहलै, ‘यी बहुउपयोगी प्रविधि हुइल ओरसे किसानके लाग सहज रहठ । व्यावसायिकरुपमे खेती कैना कृषक ओ समूहके लाग समय व्यवस्थापनमे यी सघाउ पुगाई ।’

रजवारा ब्लक समूहसे यी वर्ष १०० हेक्टरमे गोहुँ खेती करले बा । कृषि ज्ञान केन्द्रके तीन वर्षे ब्लक प्रदर्शन कार्यक्रमअन्र्तगत दुसरा वर्ष रु १० लाख बराबरके कृषि यन्त्र हस्तान्तरण करल कृषि प्रसार अधिकृत चौधरी बटैलै । ‘गोहुँ ब्लक समूहहे ५० प्रतिशत अनुदान सहयोगमे पावर टिलर वितरण करटी बटी’, कृषि प्रसार अधिकृत चौधरी कहलै, ‘कृषक समूहके समेत लगानी हुइलेसे अपनत्व हुई, ओइने सामग्रीके स्याहार करठै कना उद्देश्य हो ।’ ओस्टेक प्रदेशके मुख्यमन्त्री कृषि कार्यक्रमअन्र्तगत कैलालीके और ठाउँमे समेत कृषियन्त्र उपकरण वितरण जारी रहल उहाँक कहाई बा । उहाँ किसान परियोजना २ के संयुक्त आर्थिक तथा प्राविधिक ओ लगानीमे जोशीपुर गाउँपालिका–३ मनिकापुर कृषि समूहहे दुई ठो पावर टिलर हस्तान्तरण करल बटैलै ।

कृषि उत्पादन बढैना सहयोग पुगैना बर्सेनी स्थानीय ओ प्रदेश सरकारके टमान निकायसे कृषियन्त्र वितरण करटी रहल बटै । कैलालीमे सञ्चालित रानी जमरा कुलरिया सिँचाइ आयोजना सञ्चालनपाछे कैलालीके किसानसे कृषियन्त्र, प्रावित्रिक ज्ञान ओ टमान कृषि बालीमे अनुदान सहयोग पैना करल बटैलै ।

जिहीसे किसानहे फाइदा हुइटी रहल किसान सन्दिप चौधरी बटैठै । ‘सिँचाइ आयोजना सञ्चालनपाछे युवासमेत कृषिमे लागल बटै । अनुदान, प्रविधिजैसिन सहयोग, सिँचाइके सुविधा हुइलपाछे पढललिखल युवा नयाँ प्रविधिके प्रयोगमे खेती सुरु करले बटै ।’