एलपिएल प्रिमियर लिग सुरु

पहुरा समाचारदाता
धनगढी, १५ फागुन । धनगढीमे शनिच्चरसे हुइल विद्यालयस्तरीय राष्ट्रिय क्रिकेट प्रतियोगिता लिटल फ्लावर प्रिमियर लिगमो विद्या भूषण विजयी सुरुवात करले बा ।

धनगढीके लिटल फ्लावरहे ७ विकेटसे पराजित करटी कैलालीके गेटामे रहल विद्या भूषणसे विजयी सुरुवात करल हो । टस जिटके ब्याटिङ करल लिटल फ्लावरसे निर्धारित २० ओभरमे ९ विकेट गुमैटी एक सय ५२ रन बनाइल ।

ओकर लाग सुवाश ऐर ३७, नरेन भट्ट ३६, कप्तान विपिन रावल १५ ओ राजकुमार शाहसे १२ रन बनाइल । बलिङमे विद्या भूषणके शेर मल्ल ३, वीरन्द्र नाथ ओ प्रदिप चन्द २÷२ तथा सञ्जय केसीसे १ विकेट लेलै ।

१ सय ५३ रनके विजयी लक्ष्यसहित मैदान उत्रल विद्या भूषणसे १७ दशमलव ५ ओभरमे ३ विकेट गुमैटी लक्ष्य भेट्टाइल । विद्या भूषणके सुरुवाती ब्याट्सम्यान शेर मल्ल ओ विरेन्द्र नाथसे १ सय २२ रनके साँझेदारी करलै । मल्लसे ७० ओ नाथसे ३७ रन बनाइल । नरेन साउँद अविजित रहटी २६ रन बनाइल । लिटल फ्लावरके राजकुमार शाहसे २ ओ विपिन रावलसे १ विकेट लेलेसेफे टीमहे जिटाई नइसेकल । खेलके म्यान अफ द म्याच विद्या भूषणके शेर मल्ल हुइलै ।

लिटल फ्लावर स्पोर्टस एन्ड इभेन्टसके आयोजनामे धनगढीके संघीय प्रहरी इकाई कार्यालयके खेल मैदानमे प्रतियोगिता सुरु हुइल हो ।

यी आघे प्रतियोगिताके धनगढी उपमहानगरपालिकाके मेयर नृपवहादुर ओडसे उद्घाटन करलै । प्रतियोगिताके उदघाटन करटी मेयर ओड धनगढी उपमहानगरसे राष्ट्र, स्वास्थ्य ओ समाजके लाग समेत खेलकुद कना नीति अवलम्बन करल उल्लेख करटी खेलकुद प्रतियोगिताहुक्रे निरन्तरता पाई पर्नामे जोड डेलै । लिग कम नक आउटके आधारमे प्रतियोगिता हुइटी रहल लिटल फ्लावर स्पोर्टस एन्ड इभेन्टसके अध्यक्ष रामचन्द्र शाही बटैलै ।

प्रतियोगितामे देशभरके १६ विद्यालयके सहभागिता रहल शाहीसे जानकारी डेलै । काठमाडौँ ओ कञ्चनपुरके २/२, रुपन्देही ओ दाङके एक÷एक ओ कैलालीके १० विद्यालयके सहभागिता रहल बा ।

प्रतियोगिताके विजेतासे एक लाख २० हजार नगदसहित ट्रफी ओ प्रमाणपत्र पैना बा कलेसे उपविजेतासे ६० हजार प्राप्त करेबेर सर्वोत्कृष्ट खेलाडी १० हजार पैही । ओस्टेक उत्कृष्ट ब्याट्सम्यान, बलर ओ उदीयमान खेलाडीहे जनही ५/५ हजार प्रदान कैजाई । म्यान अफ दि म्याचसे १ हजार ५ सय पैही ।