का फुरेसे जागि थरुहट ?
थरुहट थारुवान राष्ट्रिय मोर्चाके डोसर विशेष राष्ट्रिय सम्मेलन फागुन १५ ओ १६ गटे कैलालीके हसुलियामे निम्जल बा । मने इ सम्मेलनमे मोर्चाके केन्द्रिय संयोजक लक्ष्मण थारुके उपस्थितिके अभाव खटकल । हुँकहिन आपन भ्वाइस रेकर्ड कैके सम्मेलनहे सम्बोधन कर्ना अवस्था अइलिन । उच्च अदालत दीपायलसे टीकापुर घटनामे जन्मकैदके फैसला सुनाइलपाछे लक्ष्मण थारु अद्र्धभूमिगत बटाँ ।
भ्वाइस रेकर्डमे लक्ष्मण थारुके हुंकार बा, अपन भेला संगठन, एकता, अभियान ओ आन्दोलन दासता विरुद्धके विद्रोके तयारी आब नैरुकी । प्रशासनके धाक धम्की त्रास अपन उपर झुठा मुद्दा, सांसद रेशम चौधरीउपरके जन्मकैदके फैसला मन्ना तयार नैरहल उहाँक कहाइ बा । थरुहट आन्दोलनके लग लक्ष्मण थारुके संयोजनमे जो लिम्बुवान, खम्बुवान, ताम्सालिङ, मगरात, नेवा, दलित लगायटसे साथ समर्थन बा । ओइनके प्रतिनिधि फेन कार्यक्रम आके थरुहट आन्दोलनहे अपन साथ रहल उद्घोस कर्ला । थरुहट आन्दोलनके लग इ उर्जा लन्ना बाट हो ।
थरुहट आन्दोलनके लग लिम्बुवान, खम्बुवान, ताम्सालिङ, मगरात, नेवा, दलित लगायटसे साथ समर्थन टे पर्लि बा । मने सबसे अहम् सवाल थरुहट आन्दोलनके लग आन्दोलनके जगमे नेता हुइलक अगुवन एकजुट हुइना जरुरि बा । यकर लग सक्कुजाने अक्के पार्टीम हुइहि परठ कना नैहो । जस्टे कि पूर्वमन्त्री रहल नेपाली काँग्रेसके केन्द्रीय सदस्य डा. गोपाल दहित थरुहट थारुवान मोर्चासे उठाइल मुद्दा सम्बोधनमे आपन साथ समर्थन रहल जनैला । उहाँक कहाइ रहे, ‘पार्टीभिट्टर अन्तरसंघर्ष कैटी टीकापुर घटनाहे राजनीतिक मुद्दा बनाके जेलबन्दीहे रिहाई कराइ परल ।’
टीकापुर घटनाके अन्यायपुर्न फैसलाहे चिरक लग मेरमेरिक पार्टीभिट्टर रहल थारु अगुवन अन्तरसंघर्ष करल समाचार बहुट कम आइठ । पहिचान पक्षीय सक्कु जनहनसे सहकार्य कैके राज्यहे डवाव डेनाके विकल्प नैहो । मने डवाव पुगल नैहो । कार्यक्रममे डा. दहित थरुहट थारुवान मोर्चासे उठाइल मुद्दा सम्बोधनमे आपन साथ समर्थन रहल टे बटैलाँ । मने उहाँ अपन पार्टी कांगे्रसमे यकर बारेम आवाज उठाइल नैसुनगैल हो । उप्रे उप्रे बोल्ना कि भिट्टर मनसे बोलके अपन पार्टीम् टीकापुर मुद्दाहे स्थापित करैना ? नेतन आब टे अलमलमे नै परक चाहि ।
जेकर मुद्दा ओकर अगुवाइ कना सवालमे थारु कल्याणकारिणी (थाकस) सभा फेन थरुहट थारुवान मुद्दाहे आगे बह्रैले रहे । मने २०७२ भडो ७ ओ ८ गटेके घटनाके पाछे थाकस अलमलमे बा । उ घटनापाछे थाकस केन्द्रिय अध्यक्ष धनिराम चौधरी कार्यक्रममे घुसपैठ हुइल कारन थाकस केन्द्र उ घटनाके जिम्मेदारि लेहे नैसेक्ना अभिब्यक्टि डेले रहिट । जबकि उ मुद्दाके कारन उहो अद्र्धभुमिगत जिन्गि बिटैटि बटाँ । उहे मुद्दाके कारन उ डोसर कार्यकाल थाकस केन्द्रिय अध्यक्ष छानगैलाँ । फिर भि इ मुद्दा थाकस केन्द्रके प्राथमिकतामे नैरना कलक थाकसके अगुवन अभिनसम कुहिरक कौवा बटाँ ।
गइल बरस हुइल थरुहट थारुवान राष्ट्रिय मोर्चाके पहिल बृहत कार्यक्रममे थाकसके केन्द्रिय पदाधिकारि कोइ नै रहिट । थाकस सहमहामन्त्रि मिनराज चौधरी उ कार्यक्रममे सहभागि हुइल कारन हुँखिन स्पस्टिकरन डेहे परल रहिन । हुँखिन अभिन फेन थाकसके जिम्मेवारि नै डे गइल हो । थरुहट थारुवान राष्ट्रिय मोर्चाके अप्कि हुइल डुसर कार्यक्रममे फेन थाकसके आधिकारिक केन्द्रिय पदाधिकारि नै रहिट । थरुहट थारुवान आन्दोलनके अगुवाइ थाकस केन्द्र अपने करे नैसेक्ना, आउर समुह कैलेसे साथसमर्थन टे डुर, उल्टे विरोढ कर्ना । का इहे रवैयाले फुरेसे जागि टे थरुहट आन्दोलन ? थारु शक्ति एकजुट नैहुइट सम थरुहट थारुवान आन्दोलन आगे बह्रे नैसेकि । इ बाट अगुवन मनन करिट ।
