नेपालमे विकासके मोडल नैहोः मुख्यमन्त्री भट्ट
पहुरा समाचारदाता
धनगढी, १८ फागुन । नेपालमे विकासके कौनो मेरके मोडल नै रहल ओरसे विकास नै हुइसेकल मुख्यमन्त्री त्रिलोचन भट्ट बटैले बाटै ।
धनगढीमे सोम्मारसे सुरु हुइल नगर विकास कोष नगरपालिका वित्त तथा क्षमता विकास कार्यक्रमके प्रादेशिक कार्यशाला गोष्ठीके उद्घाटन सत्रहे सम्बोधन कैटी मुख्यमन्त्री भट्ट विकसित राष्ट्रके विकासके लाग अपने मोडल रहल मने नेपालमे कौनो फेन विकासके मोडल नै रहल ओरसे विकास हुइ नै सेकल बटाइल हुइट ।
‘हमार यहाँ विकासके लाग टमान योजना निर्माण हुइठ्, ओकर लाग बजेट फेन विनियोजन हुइठ्,’ उहाँ कहलै– ‘मने उहीहे कार्यान्वयन अथवा निर्माणके लाग कौनो फेन मोडल नै रहल ओरसे विकास नै हुइल डेखाइठ् ।’
उहाँ आघे कहलै– ‘हमार यहाँ आआपन व्यक्ति व्यक्तिके योजना बा । कौनो फेन विकास निर्माणके लाग व्यक्तिके आधारमे, पार्टीके आधार अथवा कहि न भनसुनके आधारमे हुइना योजना छनौट तथा बजेट विनियोजनसे विकास निर्माणके कार्य नै हुइ सेकठ् । विकासके लाग सरकारसे एकठो मोडल बनाइ पर्ना आवश्यक रहल बा ।’
ओस्टके मुख्यमन्त्री भट्ट वित्त आयोगके निर्माण करल वित्तिय प्रणाली गलत रहल ओरसे जहाँ विकास करे पर्ना हो उहाँ विकास नै हुइ सेकल जिकिर करलै । मुख्यमन्त्री भट्ट जनसंख्याके आधारमे नै हो, विकासके आवश्यकता अनुसार वित्त आयोग ऋण प्रवाहके साथे अनुदान डेना आवश्यक रहल बटैलै ।
साथे उहाँ विकासके लाग हमार काम कैना तौर तरिकासे लेके योजना निर्माण शैलीहे परिवर्तन कैना औंल्याइल रहिट ।
यकर साथे मुख्य मन्त्री भट्ट प्रदेशके समग्र विकासके लाग नगर विकास कोषसे सहकार्य ओ समझदारी कैके आघे बह्रना फेन सरकार प्रतिबद्ध रहल बटाइल रहिट ।
नेपाल नगरपालिका संघके अध्यक्ष अशोक कुमार श्रेष्ठ कौनो फेन विकास निर्माण लगायत कौनो काम करेबर तीनु सरकार एक औरे बिच सहकार्य कैना आवश्यक रहल बटाइल रहिट । उहाँ कौनो फेन योजनाके लाग तीनु तह आर्थिक सहकार्य कैना औंल्याइल रहिट ।
धनगढी उपमहानगरपालिकाके नगरप्रमुख नृप बहादुर वड नगर विकास कोषसे यहाँके नगरपालिकाके अवस्थाके बारेम बुझ्ना आवश्यक रहल बटाइल रहिट । उहाँ कहलै– ‘यहाँके १०/१२ ठो नगरपालिका बाहेक सक्कु नगरके अवस्था दयनीय बा । कौन नगर पालिकाके अवस्था कैसिन बा, आर्थिकसे लेके विकास निर्माणके अवूस्था बुझ्ना जरुरी बा । साथे उहे आधारमे ऋण लगानीसे लेके अनुदानके कार्यक्रममे फेन सहभागिता करैना आवश्यक बा ।’
गौरीगंगाके नगरप्रमुख तथा नगर विकास कोष सञ्चालक समिति सदस्य भीम बहादुर देउवा नगर विकास कोष नगरपालिका वित्त तथा क्षमता विकास बारे सक्कु नगरपालिकाहे बुझैना आवश्यक रहल बटाइल रहिट । उहाँ इ बारे पुरान नगर किल जानकार रहल ओरसे सक्कु नगरपालिकाहे यकर बारे जानकारी डेना आवश्यक रहल बटाइल रहिट ।
कार्यक्रममे नगर विकास कोषके दूरदृष्टि एवं ४ बर्षे व्यवसायिक योजना बारे नगर विकास कोषके कार्यकारी निर्देशक कृष्ण प्रसाद सापकोटा, नगर विकास कोषके व्यवसाय प्रवद्र्धन तथा कार्य प्रक्रिया नगर विकास कोषके उप प्रवन्धक राजेश कुमार भोछिभोया ओ सह लगानी तथा वैकल्पिक वित्तिय स्रोत परिचालन विधी बारे योजना अनुगमन तथा मूल्यांकन विज्ञ नारायण विसी कार्यपत्र पस्तुत करल रहिट ।
कार्यक्रम नगर विकास कोषके कार्यकारी निर्देशक कृष्ण प्रसाद सापकोटाके अध्यक्षतामे हुइल रहे । कार्यक्रमके सञ्चालन नगर विकास कोषके सुवास राज पन्त करल रहिट । कार्यशाला गोष्ठीमे प्रदेश अन्र्तगतके ३४ ठो नगरपालिकाके नगर प्रमुख, उपप्रमुख लगायत कार्यकारी प्रमुख, इन्जिनियरहुक्रनके सहभागिता रहल बा ।
