मोर्चाके विद्रोही घोषणापत्रके अर्थ
फागुन १५ ओ १६ गटे थरुहट थारुवान राष्ट्रिय मोर्चाके हसुलियामे सम्पन्न हुइल २ डिने राष्ट्रिय सम्मेलन १५ बुँदे घोषणापत्र जारी कैले बा । इ घोषणापत्रके बुँदा केराइबेर गलट अर्थ लग्ना फे डेखाइठ । जस्टे कि बुँदा ३ मे हिंसा, डर, त्रास, धाक, धम्की आतंक, चन्दा असुली, लुटपाट नैकैके सभ्य शालिन भद्र तवरसे अधिकार प्राप्ती ओ स्थायी शान्तिके लाग शान्तिपूर्ण विद्रोह हुइना उल्लेख बा । यकर सोझौला अर्थ लगाइबेर पहिले मोर्चा डर, त्रास, धाक, धम्की आतंक, चन्दा असुली, लुटपाटमे फे लागल रहे, आब नै लागि कना डेखाइठ ।
घोषणापत्रके परटेक हस बुँदाके अन्टमे ‘हमार विद्रोह हुइना बा’ कना उल्लेख बा । याने कि मोर्चा अइना डिनिम विद्रोहके जो झन्डा फहराइ कना डेखाइठ । राज्यके पुनःसंरचनामे जातिय ऐतिहासिक पृष्ठभूमिके आधारमे पहिचान सहित नामांकन सीमांकन एवं अधिकार सम्पन्न थरुहट स्वायत्त प्रदेशके स्थापना हमार विद्रोह हुइना बा कहि गैल बा । थरुहट स्वायत्त प्रदेशके स्थापना टे आबक लग एक दिवास्वप्न हस बा । बेनसे प्रथाजनित मूूल्य मान्यता (बरघर भलमन्सा मटाँवा) हे संवैधानिक ओ कानुनी मान्यता डेहुवाइक लाग हमार विद्रोह हुइना बा कना जौन बुँदा बा, यम्ने टेक्के मोर्चा आगे बह्रके बरघर प्रथाहे संस्थागत कर्ना अभियान सफल पारे सेकि कलेसे बरवार उपलब्ढि रहि ।
थरुहट आन्दोलनकर्मी ओ सरकारबीच मेरमेरिक समयमे हुइल सम्झौता कार्यान्वयन करे पर्ना, लाल आयोगके प्रतिवेदन सार्वजनिक करे पर्ना लगायट बहुट बुँदा पुराने बा । बुँदा नं. १५ के थारुनके भाषा, धर्म संस्कृति, सभ्यता, सम्पदाके संरक्षण, संवद्र्धन प्रवद्र्धनके लाग सरकारहे दबाब डेना बाट सबसे महत्वपुर्न बा ।
पुरुब मेचीसे पश्चिम महाकालीसमके जिल्लामे संयुक्त भेला, अन्तरक्रिया कार्यक्रम कैना, तराईके सक्कु जिल्लामे हस्ताक्षर अभियानसहित विरोध, कोणसभा कैना जैसिन आन्दोलनके कार्यक्रमके साथसाथे अइना वैशाख १० गते १० लाख हस्ताक्षर प्रमुख जिल्ला अधिकारीमार्फत राष्ट्रपतिहे बुझैना सम्मेलनसे तय हुइल बा ।
जिल्ला अदालत कैलालीके फैसलासे ४२ महिना सजाय पाके जेल मुक्त हुइल मोर्चाके केन्द्रीय संयोजक लक्ष्मण थारु उच्च अदालत दीपायलके जन्मकैदके फैसलापाछे अर्धभूमिगत बाटै । अब्बे मोर्चाके कार्यबाहक संयोजक श्रवण थारु बाटै । संसद भिट्टरके पार्टीमे जनप्रतिनिधि रहलहे सरकार चिन्हठ, न कि सामान्य मोर्चाहे । मोर्चा पार्टीमे रुपान्तरन हुइना कौनो संकेत घोषणा पत्रमे नैहो । का मोर्चा सड्ड विद्रोही किल रहि ?
