एलपीएलः लिटल फेलावर ओ स्टेपीङ स्टोनके पहिल जित

पहुरा समाचारदाता
धनगढी, २१ फागुन । लिटल फ्लावर स्कुल ओ स्टेपीङ स्टोन चण्डिका ग्रुप लिटल फ्लावर प्रिमियर लिग (एलपीएल) क्रिकेटमे पहिल जित निकरले बा । बिफेक रोज हुइल पहिल खेलमे शारदा स्कुलहे ९ विकेटसे पराजित करटी लिटल पहिल जित निकारल हो ।

संघीय प्रहरी इकाई कार्यालयके खेल मैदानमे शारदासे डेहल ९४ रनके लक्ष्य लिटल ९ ओभरमे १ विकेट गुमाके पुरा करल । लिटलके जितमे सुवाश ऐरविस्फोटक ब्याटिङ करटी १६ बलमे ५२ रनके अर्धशतकीय इनिङ्स खेललै ।

प्लेयर अफ दि म्याच बनल सुवाश यी प्रतियोगिताके सर्वाधिक हली अर्धशतक बनैना खेलाडी बन्लैं । उहाँ ६ छक्का ओ तीन चौका प्रहार करलैं । अस्टेक नरेन भट्ट अविजित ३१ रन जोरेबेर अनुराग सिंह अविजित ६ रन बनैलैं ।

शारदाके लक्की कडायत १ विकेट लेनैं । यी आघे पहिल ब्याटिङ करल शारदा २० ओभरमे ७ विकेट गुमाके ९३ रन बनैले रहे । ओकर सचिन साउँद अविजित ३१ रन जोरलैं । युवराज थापा १४ रन बनैलैं । लिटलके मनोज चनारा, सुवाश ऐर ओ सचिन भट्ट २/२ विकेट लेनैं ।

अस्टेक दोसर खेलमे धनगढी नमुनाहे ९ विकेटसे पराजित करटी स्टेपीङ स्टोन पहिल जित दर्ता करले बा । पहिले ब्याटिङ करल धनगढी नमुना ११ ओभरमे अलआउट हुइटी ४८ रन बनैले रहे ।
ओकर लाग आयुस खड्का सर्वाधिक १९ रन बनैलैं । धनगढीहे सस्तामे समोट्ना स्टेपीङके भुपेश जोशी १० रन खर्चके ६ विकेट लेनैं । सुभम जैशी २ विकेट लेनैं ।

धनगढीसे डेहल ४९ रनके लक्ष्य स्टेपीङ ५ ओभर ३ बलमे १ विकेट गुमाके पुगल । स्टेपीङके अविशेक कुँवर अविजित ३२ रन जोरलैं । धनगढीके अनुप कुँवर १ विकेट लेनैं । खेलके म्यान अफ द म्याच स्टेपीङके भुपेश जोशी हुइलैं ।

लगातार दोसर हारसंगे धनगढी नमुना प्रतियोगितासे बाहेर हुइल बा । प्रतियोगितामे १६ टिमके सहभागिता बा ।

विजेता १ लाख २० हजार पाइ । ओस्टेक उपविजेता ६० हजार प्राप्त करी कलेसे सर्वोत्कृष्ट खेलाडी १० हजार पैही । उत्कृष्ट ब्याट्सम्यान, बलर ओ उदयमान खेलाडी ५/५ हजार पैही ।