महादेव सावउसके पहिल वार्षिक साधारणसभा
पहुरा समाचारदाता
पहलमानपुर, २१ फागुन । महादेव सामुदायिक वन उपभोक्ता समूह घोडाघोडी नगरपालिका–११, सिसैयाके पहिल वार्षिक साधारणसभा तथा सार्वजनिक सुनुवाई कार्यक्रम पहलमानपुरमे हुइल बा ।
सामुदायिक वन समन्वय समिति पहलमानपुरके अध्यक्ष पुष्कलबहादुर बमके बर्का पहुनामे हुइल कार्यक्रममे उहाँ मन्त्रालय सामुदायिक वनहे खेतीपतीके रुपमे लेहल आरोप लगैलै । उहाँ कहलै, वडा भिटर रहल लडिया, टलुवामे गिरल कठुवाहे वडा कार्यालयके जिम्मा लगाई परल ।
घोडाघोडी नगरपालिका–११ के वडाध्यक्ष दानसिंह जोगी तीन तहके सरकार हुईल कारण सामुदायिक वन धारापमे परल बटैलै । उहाँ कहलै, संघीय, प्रदेश ओ स्थानीय सरकार ओ अपन हाली मुहाली जमाई खोजल कारण सामुदायिक वन तीन तहके सरकारके चेपुवामे बा ।
कार्यक्रममे सव डिभिजन वन कार्यालय सुखडके ज्ञानु चौधरी, समूहके सदस्य यज्ञराज अवस्थी, तिल्कहनीपुर सामुदायिक वन उपभोक्ता समूहके सदस्य हरिप्रसाद जोशी लगायत मन्तव्य व्यक्त करले रहिट ।
कार्यक्रममे संस्थाके सचिव सृजना कठरिया ४९ हजार ६ सय २० रुप्या बराबरके आयव्यय प्रस्तुत करल रहिट । ओस्टेक वार्षिक साधारणसभा तथा सार्वजनिक सुनुवाई कार्यक्रममे व्यवस्थापन समिति, अनुगमन समिति, सल्लाहकार समिति, लेखा समिति, वन हेरालु, विशेष सहयोगीहुकनहे सम्मान कैगिल रहे ।
महादेव सामुदायिक वन उपभोक्ता समुहके अध्यक्ष पाहरीलाल चौधरीके अध्यक्षतामे हुइल कार्यक्रमके संचालन टिआर कठरिया ओ स्वागत मन्तव्य पण्डितराम कठरिया करले रहिट ।
